រដ្ឋាភិបាលចិនទីក្រុងប៉េកាំង បានចោទប្រកាន់អាម៉េរិកបកវិញថា បានបង្ហោះបាឡុងចារកម្មជាង ១០ដងចូលដែនអាកាសរបស់ខ្លួនកាលពីឆ្នាំមុន ខណៈសហរដ្ឋអាម៉េរិកបានបដិសេធ។
អ្នកនាំពាក្យក្រសួងការបរទេសចិន លោក Wang Wenbin បាននិយាយនៅក្នុងសន្និសីទសារព័ត៌មានមួយកាលពីថ្ងៃចន្ទថា “វាជារឿងធម្មតាទៅហើយសម្រាប់បាឡុងចារកម្មរបស់សហរដ្ឋអាម៉េរិកក្នុងការចូលទៅក្នុងដែនអាកាសនៃប្រទេសដទៃទៀតដោយខុសច្បាប់” ។ លោក Wang បាននិយាយបែបនេះ ក៏ប៉ុន្តែលោកមិនបានផ្តល់ព័ត៌មានលម្អិតអំពីរបៀបដែលអាជ្ញាធរចិនដោះស្រាយជាមួយបាឡុងទាំងនោះបែបណានោះទេ។ លោក Wang ថា “ចាប់តាំងពីឆ្នាំមុនមក បាឡុងកម្ពស់ខ្ពស់របស់អាម៉េរិកបានហោះហើរដោយខុសច្បាប់លើដែនអាកាសរបស់ប្រទេសចិនច្រើនជាង ១០ ដងដោយគ្មានការយល់ព្រមពីអាជ្ញាធរចិន”។ លោកបន្តទៀតថា “សហរដ្ឋអាម៉េរិកគួរតែឆ្លុះបញ្ចាំងពីខ្លួនឯងជាមុនសិន មុនពេលផ្លាស់ប្តូរផ្លូវ ទៅជាការលាបពណ៌ និងញុះញង់ឱ្យមានការប្រឈមមុខដាក់គ្នា”។
ឆ្លើយតបបន្តបន្ទាប់គ្នា សេតវិមានបានបដិសេធភ្លាមៗនូវការអះអាងរបស់ចិនថាជារឿងមិនពិតទេ។ លោក John Kirby ជាអ្នកនាំពាក្យសន្តិសុខជាតិបាននិយាយនៅក្នុងបទសម្ភាសន៍ជាមួយ MSNBC ថា “យើងមិនបានហោះហើរលើប្រទេសចិនឡើយ”។
គួររំលឹកថា ការចោទប្រកាន់គ្នាកាលពីថ្ងៃចន្ទសប្តាហ៍នេះ បានកើតឡើងប៉ុន្មានថ្ងៃបន្ទាប់ពីសហរដ្ឋអាម៉េរិកបានបាញ់ទម្លាក់បាឡុងចារកម្មចិនដែលសង្ស័យថាបានឆ្លងពីរដ្ឋអាឡាស្កាទៅកាន់រដ្ឋ South Carolina ដែលបង្កឱ្យមានវិបត្តិថ្មីនៅក្នុងទំនាក់ទំនងរវាងប្រទេសដែលមានសេដ្ឋកិច្ចកំពូលទាំងពីរ៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
