បន្ទាយមានជ័យ៖នគរបាលក្រុងប៉ោយប៉ែត កាលពីថ្ងៃទី១៣ ខែកុម្ភៈ បានឃាត់ខ្លួនចាងហ្វាង សារព័ត៌មាន១រូប សង្ស័យពាក់ព័ន្ធករណីឆបោកលុយ៣ពាន់ដុល្លារ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីនគរបាលបានឱ្យថា បុរសដែលឃាត់ខ្លួនឈ្មោះអ៊ុង ថាប់រាំង ហៅបារាំង អាយុ៥៦ឆ្នាំ ជាចាងហ្វាងសារព័ត៌មាន“ខ្មែរជាយដែន” កន្លែងកំណើតភូមិនាងកេត ឃុំឫស្សីក្រោក ស្រុកមង្គលបូរី ស្នាក់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ។ចំណែកដើមបណ្តឹងឈ្មោះ ឱក ទីនណា និងឈ្មោះសឿង សីហា។
ប្រភពដដែលបានបន្តថា តាមដីកាបង្គាប់ឱ្យនាំខ្លួនឈ្មោះអ៊ុង ថាប់រាំង ឱ្យចូលមកបង្ហាញខ្លួននៅស្នងការដ្ឋាននគរបាលខេត្តបន្ទាយមានជ័យ ដើម្បីឆ្លើយបំភ្លឺពាក់ព័ន្ធនឹងករណីឆបោក កាលអំឡុងឆ្នាំ២០១៨ ស្ថិតក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត កំណត់ឱ្យបានមុនថ្ងៃទី៩ ខែមីនា ឆ្នាំ២០២៣។
ការនាំខ្លួនឈ្មោះ អ៊ុង ថាប់រាំងនេះ ករណីឆបោកលុយចំនួន៣.០០០ដុល្លារ ដោយទទួលយកទៅរត់ការធ្វើប្លង់ដីឱ្យគេនៅអំឡុងឆ្នាំ២០១៨ ខណៈធ្វើមិនបាននិងមិនព្រមប្រគល់លុយឱ្យគេវិញ ទើបម្ចាស់លុយប្តឹងទៅតុលាការ ហើយក៏ចេញដីកាបញ្ជានាំខ្លួនលេខ០០១ ចុះថ្ងៃទី៩ ខែកុម្ភៈ ឆ្នាំ២០២៣ ត្រូវបញ្ជូនខ្លួនទៅតុលាការតែម្តង៕ដោយ៖វិចិត្រ