រដ្ឋាភិបាលឥណ្ឌាមានបំណងចង់ឲ្យការនាំចេញផលិតកម្មការពារជាតិរបស់ខ្លួននៅឆ្នាំ២០២៤ និង ២០២៥ ឡើង៣ដងស្មើនឹង៥ពាន់លានដុល្លារ ដោយជំរុញលើកទឹកចិត្តឲ្យមានការចូលរួមយ៉ាងខ្លាំងពីសំណាក់ក្រុមហ៊ុនក្នុងស្រុក និងបរទេស។
![](https://cambodiaflashnews.com/wp-content/uploads/2021/06/top-banner.gif)
ថ្លែងនៅក្នុងឱកាសបើកកម្មវិធីពិព័រណ៍អាកាសនៅថ្ងៃចន្ទទី ១៣ ខែកុម្ភៈនេះ នាយករដ្ឋមន្ត្រីឥណ្ឌា Narendra Modi បាននិយាយថា ប្រទេសឥណ្ឌាពិតជាចង់ឱ្យមានការនាំចេញផ្នែកការពារប្រចាំឆ្នាំច្រើនជាងបីដងធៀបនឹងឆ្នាំធម្មតា ពោលគឺនឹងរកបានរហូតទៅដល់ ៥ពាន់លានដុល្លារនៅឆ្នាំ ២០២៤/២០២៥ ខណៈបច្ចុប្បន្នគឺ ១,៥ពាន់លានដុល្លារ។ ម៉ូឌីថា “សព្វថ្ងៃនេះ ឥណ្ឌាមិនមែនគ្រាន់តែជាទីផ្សារសម្រាប់ក្រុមហ៊ុនការពារជាតិប៉ុណ្ណោះទេ វាក៏ជាដៃគូការពារដ៏មានសក្តានុពលផងដែរ” ។ “ខ្ញុំសូមអំពាវនាវដល់វិស័យឯកជនរបស់ប្រទេសឥណ្ឌាឲ្យវិនិយោគបន្ថែមទៀតក្នុងវិស័យការពារជាតិរបស់ប្រទេស”។ លោកបានបន្ថែមថា ឥណ្ឌាជាប្រទេសនាំចូលឧបករណ៍ការពារធំបំផុតមួយរបស់ពិភពលោកអស់រយៈពេលជាច្រើនទសវត្សរ៍មកហើយ ឥឡូវនេះបាននាំចេញទៅកាន់ ៧៥ ប្រទេសរួចហើយ។
ការនាំចេញរបស់ឥណ្ឌាកន្លងមករួមមាន ឧទ្ធម្ភាគចក្រ Hindustan Aeronautics ទៅកាន់ហ្វីលីពីន និងអេក្វាឌ័រ។ ក្រុមហ៊ុន HAL ក៏បានផ្តល់យន្តហោះប្រយុទ្ធធុនស្រាល Tejas របស់ខ្លួនសម្រាប់លក់ទៅឱ្យម៉ាឡេស៊ីផងដែរ។ តាមសេចក្តីរាយការណ៍ពីសារព័ត៌មានរ៉យទ័រ ឥណ្ឌាគ្រោងនឹងធ្វើពិព័រណ៍អាកាសនេះរយៈពេលច្រើនថ្ងៃទៀត និងកំពុងសម្លឹងរកមើលការចុះហត្ថលេខាលើកិច្ចព្រមព្រៀងការពារជាតិជាមួយក្រុមហ៊ុនបរទេសដែលមានតម្លៃ ៧៥០ ពាន់លានរូពី (ស្មើនឹង៩ ពាន់លានដុល្លារ)។ ពិព័រណ៍នេះមានការចូលរួមពីសំណាក់ក្រុមហ៊ុនការពារជាតិក្នុងស្រុក និងក្រៅស្រុកជាច្រើនរួមមានត្រួសៗដូចជា Airbus, Boeing, Lockheed Martin, Israel Aerospace Industry, Rolls Royce។ល៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា