ប្រធានាធិបតីប៉ូឡូញដែលជាអ្នកជិតខាងបាននិយាយថា អ៊ុយក្រែនត្រូវការអាវុធបន្ទាន់ខ្លាំងណាស់ ត្រូវតែប្រញាប់ដឹកឲ្យលឿនក្នុងរយៈពេលប៉ុន្មានសប្តាហ៍ខាងមុខនេះ បើមិនដូច្នេះទេ រុស្ស៊ីនឹងច្បាស់ជាឈ្នះសង្រ្គាមជាមិនខាន។
ប្រធានាធិបតីប៉ូឡូញ លោក Andrzej Duda បានថ្លែងក្នុងបទសម្ភាសន៍ជាមួយកាសែតបារាំង Le Figaro ដែលត្រូវបានរាយការណ៍បន្តឲ្យដឹងនៅថ្ងៃចន្ទនេះថា អ៊ុយក្រែនកំពុងស្ថិតក្នុងគ្រាអាសន្នធ្ងន់ធ្ងរ ត្រូវការអាវុធបន្ទាន់ជាចាំបាច់។ “អ៊ុយក្រែនមានតែកម្លាំងមនុស្ស មិនមានហេដ្ឋារចនាសម្ព័ន្ធយោធាទំនើបទេ ប្រសិនបើយើងមិនបញ្ជូនសម្ភារយោធាទៅឲ្យពួកគេក្នុងប៉ុន្មាន សប្តាហ៍ខាងមុខនេះទេ លោកពូទីនអាចនឹងឈ្នះនេះហើយ។ គាត់អាចនឹងឈ្នះ ហើយយើងមិនដឹងថាគាត់នឹងឈប់នៅទីណានោះទេ”។ ប្រធានាធិបតីប៉ូឡូញ បានរំលឹកឡើងបន្ថែមទៀតថា ការវាយប្រហារដ៏មានសក្តានុពលរបស់រុស្ស៊ីក៏អាចធ្វើឡើងមកលើប៉ូឡូញ ហើយនោះនឹងក្លាយជាការវាយប្រហាររបស់រុស្ស៊ីលើអង្គការណាតូ។ ការដឹកជញ្ជូនជំនួយអាវុធលោកខាងលិចហាក់មិនទាន់ចិត្ត ដោយសារអាវុធធុនធ្ងន់ភាគច្រើនដូចជារបស់អាម៉េរិកក្តី ត្រូវការយកចេញពីរោងចក្រផលិតផ្ទាល់ ខណៈដែលការបណ្តុះបណ្តាលទាហានអ៊ុយក្រែនក៏មិនទាន់ត្រូវបានបញ្ចប់រួចរាល់ផងនោះ។
ការអំពាវនាវរបស់ប៉ូឡូញ កើតឡើងបន្ទាប់ពីមេដឹកនាំទាហានស៊ីឈ្នួលរុស្ស៊ី Wagner បានអះអាងថា ទាហានបានដណ្តើមយកក្រុងសំខាន់ៗរបស់អ៊ុយក្រែនក្បែរក្រុង Bakhmut។ មេដឹកនាំក្រុមទាហានស៊ីឈ្នួលរុស្ស៊ី លោក Yevgeny Prigozhin បាននិយាយកាលពីថ្ងៃអាទិត្យថា កងទ័ពរបស់លោកបានដណ្តើមយកភូមិភាគខាងកើតអ៊ុយក្រែនមួយគីឡូម៉ែត្រពីទីក្រុងសំខាន់នៃ Bakhmut ដែលទីក្រុងមូស្គូបានព្យាយាមដណ្តើមកាន់កាប់អស់ជាច្រើនខែមកហើយ។ សម្រង់សម្ដី “ថ្ងៃនេះ អង្គភាពវាយលុករបស់ Wagner បានដណ្តើមយកទីក្រុង Krasna Hora” ។ យ៉ាងណាក៏ដោយ AFP មិនអាចបញ្ជាក់ដោយឯករាជ្យលើការអះអាងនេះបានទេ៕
ប្រភព៖UKRAINSKA PRAVDA
ប្រភពរូប៖UKRAINSKA PRAVDA
ប្រែសម្រួល៖សុខ តុលា
