ខេត្ត កណ្តាល៖ សាលាអន្តរជាតិ បេសហ្វូ្យតឆ័រ(Best Future International School) កាលពីថ្ងៃទី១២ ខែកុម្ភៈ ឆ្នាំ២០២៣បានប្រគល់វិញ្ញាបនបត្រជូនសិស្សានុសិស្សចំនួន៣៥០នាក់។សិស្សានុសិស្សដែលទទួលបានវិញ្ញាបនបត្រនាពេលនេះ មានចាប់ពីថ្នាក់មត្តេយ្យឡើងទៅរហូតដល់ការសិក្សាវគ្គខ្លីៗ។
ឯកឧត្តម គង់ ចាន់ណា ទីប្រឹក្សារាជរដ្ឋាភិបាល អនុប្រធានក្រុមប្រឹក្សាសហគមនិងអ្នកជំនាញអចលនទ្រព្យកម្ពុជា ឯកឧត្តម អិុន ណាង ជាទីប្រឹក្សារាជរដ្ឋាភិបាល លោក កែវ ស៊ីណន អភិបាលរងស្រុកល្វាឯម លោក ម៉ម ប៉ូលី អនុប្រធានមន្ទីអប់រំ ខេត្តកណ្តាល និងលោក សុខ វ៉ន់សេង ប្រធានការិយាល័យអប់រំស្រុកល្វាឯមបានអញ្ជើញចូលរួមក្នុងពិធីប្រគល់វិញ្ញាបនបត្រនេះ។
លោក រ៉ូ រ៉ាន់ នាយកសាលា Best Future International School បានមានប្រសាសន៍ឱ្យដឹងថា៖សាលាអន្តរជាតិ បេសហ្វូ្យតឆ័រ បានប្រគល់ វិញ្ញាបនបត្រដល់សិស្សានុសិស្សចំនួន៣៥០នាក់ដែលបានបញ្ចប់វគ្គសិក្សាប្រាំឆ្នាំនិងវគ្គសិក្សាខ្លីៗដើម្បីលើកទឹកចិត្តដល់ពួកគាត់ដែលបានខិតខំរៀនសូត្រនាពេលកន្លងមក។
លោកនាយកសាលា បានបន្តថា៖បច្ចុប្បន្នសាលាមានបង្រៀនចាប់ពីថ្នាក់មត្តេយ្យសិក្សាឡើងទៅ ដែលក្នុងនោះរួមមានភាសាខ្មែរ អង់គ្លេស ចិន ជប៉ុន ថៃ កូរ៉េនិងថ្នាក់កុំព្យូទ័រព្រមទាំងវគ្គបណ្ដុះបណ្ដាលខ្លីៗ។
លោកបានបញ្ជាក់ថា៖សាលាបង្កើតនៅខែមីនាឆ្នាំ ២០១៤ ហើយបច្ចុប្បន្នមាន៣សាខាគឺនៅសាខាកៀនស្វាយ សាខាទឹកឃ្លាំងនិងសាខាព្រែករៃ។គោលបំណងនៃការបង្កើតសាលានៅជនបទនេះគឺចង់ឲ្យក្មេងៗនៅតាមទីជនបទទទួលបាននូវចំណេះដឹងចំណេះវិជ្ជាដូចក្មេងៗនៅទីក្រុងដែរជាពិសេសចង់ជួយកុមារក្រីក្រនិងកុមារនៅជនបទបានមានឱកាសសិក្សាហើយសាលាក៏មានផ្ដល់អាហារូបករណ៍ផងដែរដល់សិស្សក្រីក្រនិងកុមារកំព្រាផងដែរ។
ឯកឧត្តម គង់ ចាន់ណា ទីប្រឹក្សារាជរដ្ឋាភិបាលដែលបានអញ្ជើញជាអធិបតីក្នុងពិធីប្រគល់វិញ្ញបនបត្រដល់សិស្សនុសិស្សនេះ បានមានប្រសាសន៍ ថា៖សាលា Best Future International School ជាសាលាល្អមួយមានការគាំទ្រច្រើនពីឪពុកម្ដាយ អាណាព្យាបាល និងប្រជាពលរដ្ឋនៅទីនេះ។ជាពិសេសមានការគាំទ្រពីអាជ្ញាធរមូលដ្ឋាននិងក្រសួងអប់រំ យុវជននិងកីឡា។
ឯកឧត្តម បានបន្តថា៖សាលាអន្តរជាតិ បេសហ្វូ្យតឆ័រ ជាសាលាឯកជនមួយដែលជួយដល់ប្រជាពលរដ្ឋនៅជនបជាពិសេសនៅស្រុកល្វាឯមនិងចូលរួមចំណែកបណ្ដុះបណ្ដាលធនធានមនុស្ស យុវជនកុមារឲ្យមានចំណេះដឹងក៏ដូចជារួមចំណែកជាមួយរាជរដ្ឋាភិបាលក្នុការអភិវឌ្ឍប្រទេស។ឯកឧត្តមបានស្នើដល់គណៈគ្រប់គ្រងសាលាបន្តយកចិត្តទុកដាក់ជួយអប់រំបណ្ដុះបណ្ដាលធនធានមនុស្សឲ្យមានចំណេះដឹងទាំងផ្នែកចំណេះដឹងទូទៅ ភាសា និងវគ្គសិក្សាខ្លីៗប្រកបដោយវិជ្ជាជីវៈ។
លោក ម៉ម ប៉ូលី អនុប្រធានមន្ទីរអប់រំខេត្តកណ្តាល បានថ្លែងអំណរគុណដល់សាលាអន្តរជាតិបេសហ្វូ្យតឈ័រដែលបានខិតខំចូលរួមស្តារនិងកសាងធនធានមនុស្ស នៅក្នុងខេត្តកណ្តាលឱ្យកាន់តែល្អប្រសើរ។លោកបានលើកទឹកចិត្តដល់សិស្សានុសិស្សបន្ត ខិតខំសិក្សាបន្ថែមទៀត ព្រមទាំងអភិវឌ្ឍខ្លួន និងស្វែងរកចំណេះដឹង។
លោកសាស្ត្រាចារ្យ នៅ ប្រុស ទីប្រឹក្សាផ្នែកកម្មវិធីអប់រំ បានលើកឡើងថា៖ការអប់រំសម្រាប់កុមារនៅក្នុងសតវត្សថ្មីសម័យទំនើបចាំបាច់ក៏ត្រូវមានការចូលរួមឱ្យបានសកម្មផង ដែរពីសំណាក់អាណាព្យាបាលគ្រប់រូបដែលជាអ្នកនៅជិតស្និតជាមួយនឹងកូនៗបំផុត។ នៅពេលដែលអាណាព្យាបាលបានយល់ដឹងពីតួនាទីនិងសារៈសំខាន់ក្នុងការអប់រំកូនៗពួកគាត់នឹងអាចផ្តល់ឱកាសសម្រាប់កូនអនុវត្តនូវសកម្មភាពច្នៃប្រឌិតជាច្រើនដែលពួកគេបានរៀន ដើម្បីរុញច្រានឱ្យពួកគេកាន់តែមានឥរិយាបថល្អ បំណិនជីវិត ជំនាញក្នុងការគិតខ្ពស់ មានភាពច្នៃប្រឌិត និងមាន ភាពឈ្លាសវៃ។
ក្រៅពីកត្តានេះ ការអប់រំនៅក្នុងសតវត្សថ្មីនេះក៏ត្រូវការចាំបាច់នូវសកម្មភាព និងការផ្លាស់ប្តូរផ្តត់គំនិតរបស់កុមារ ឬយុវជន ដើម្បីឱ្យពួកគេឆ្លើយតបជាមួយនឹងភាពបត់បែនន សង្គម និងពិភពលោក៕ ដោយៈផាវី
