ប្រទេសនូវែលសេឡង់ ប្រកាសអាសន្នបិទសាលារៀន ទីក្រុង និងជើងហោះហើរបណ្តោះអាសន្ន ខណៈដែលព្យុះស៊ីក្លូន Gabrielle កំពុងខិតជិតបោកបក់ខ្លាំងនៅភាគខាងជើង នឹងបណ្តាលឲ្យមានទឹកជំនន់។
![](https://cambodiaflashnews.com/wp-content/uploads/2021/06/top-banner.gif)
យោងតាមលោកស្រី Rachel Kelleher ជាអនុប្រធានផ្នែកគ្រប់គ្រងគ្រោះអាសន្ននៃទីក្រុង Auckland បានឲ្យដឹងនៅថ្ងៃចន្ទ ទី ១៣ ខែកុម្ភៈនេះថា ស្ថានភាពនៅក្នុងទីក្រុងធំ Auckland និងតំបន់ជុំវិញជាច្រើនទៀត សុទ្ធតែត្រូវបានដាក់ក្នុងការប្រកាសអាសន្ន។ សាលារៀន ស្រឡាង ឡានក្រុង និងរថភ្លើង និងមធ្យោបាយសាធារណៈនានា រួមទាំងជើងហោះហើរត្រូវបានបិទជាបណ្តោះអាសន្នរង់ចាំការជូនដំណឹងថ្ងៃអង្គារ ខណៈដែលរបាយការណ៍ឧតុនិយមបាននិយាយថា ព្យុះស៊ីក្លូន Gabrielle កំពុងរំកិលខិតជិតឆ្នេរសមុទ្រភាគខាងជើង ចំហាយនៃទឹកភ្លៀងកំពុងកើតមានបណ្តើរៗ។ លោកស្រី Rachel Kelleher បាននិយាយនៅថ្ងៃចន្ទនេះថា “យើងគិតថាផលប៉ះពាល់នៃព្យុះស៊ីក្លូន Gabrielle នឹងកាន់តែអាក្រក់ទៅៗ មុនពេលដែលព្យុះថមថយទៅវិញ”។ តែយ៉ាងណា “វាមិនមែនជាពេលដែលត្រូវរអ៊ូនោះទេ”។
ជាមួយគ្នានេះ នាយករដ្ឋមន្ត្រីនូវែលសេឡង់ លោក Chris Hipkins ក៏បានប្រកាសកញ្ចប់ថវិកាប្រមាណ១១.៥ លានដុល្លារ NZ (ស្មើនឹង ៧.២៥ លានដុល្លារអាម៉េរិក) ដើម្បីគាំទ្រដល់ក្រុមសហគមន៍ ដូចជាធនាគារស្បៀងអាហារ និងដល់ក្រុមដែលរងផលប៉ះពាល់ដោយទឹកជំនន់។
ព្យុះស៊ីក្លូនគឺជាព្រឹត្តិការណ៍អាកាសធាតុដ៏សំខាន់ទីពីរ ដែលបានវាយលុកទីក្រុង Auckland និងកោះខាងជើងក្នុងរយៈពេលតែប៉ុន្មានសប្តាហ៍ប៉ុណ្ណោះ។ កាលពីខែមុន ទីក្រុង Auckland និងតំបន់ជុំវិញក៏បានរងការវាយប្រហារដោយជំនន់ទឹកភ្លៀង ដែលបានបង្កឲ្យមានទឹកជំនន់ និងបានសម្លាប់មនុស្ស ៤ នាក់ផងដែរ៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា