ភ្នំពេញ៖ក្រុមជនសង្ស័យបានជួលរថយន្តជិះពីក្រុងតាខ្មៅ ខេត្តកណ្តាល មកទួលព្រង រាជធានីភ្នំពេញ ហើយបានរឹតកតៃកុងបំណងប្លន់យករថយន្តតែមិនបានសម្រេច។
ករណីបង្កការភ្ញាក់ផ្អើលនេះបានកើតឡើងនៅតាមផ្លូវទួលពង្រ ហួសស្តុបថ្មីជិត៣០០ម៉ែត្រ ក្នុងសង្កាត់ចោមចៅទី១ ខណ្ឌពោធិ៍សែនជ័យ កាលពីរំលងអធ្រាត្រឈានចូលថ្ងៃទី១១ ខែកុម្ភៈ។
សមត្ថកិច្ចប្រចាំគោលដៅបានឱ្យដឹងថា មុនកើតហេតុ មានជនសង្ស័យ៣នាក់បានជួលរថយន្តតូយូតាព្រូស ផ្លាកលេខភ្នំពេញ2BA-0575 ជិះពីក្រុងតាខ្មៅ ខេត្តកណ្ដាលមកផ្សារទួលពង្រ។មកដល់កន្លែងខាងលើ ក្រុមជនសង្ស័យបានឱ្យរថយន្តឈប់ដើម្បីបត់ជើងតូច។
ពេលរថយន្តបន្ថយល្បឿន ជនសង្ស័យបានយកខ្សែហ្រ្វាំងកង់មករឹតកតៃកុង។ តែចៃដន្យខ្សែរឹតចំមាត់ទើបមានការរើបម្រះធ្វើឱ្យរថយន្តជ្រុលបុកខឿនចិញ្ចើមផ្លូវពេញទំហឹង បណ្ដាលឱ្យរថយន្តខូចខ្ទេចខ្ទីផ្នែកខាងមុខ។ក្រោយមកក្រុមជនសង្ស័យបាននាំគ្នារត់គេចខ្លួនបាត់អស់។
ចំណែកម្ចាស់រថយន្តរងគ្រោះបានទៅដាក់ពាក្យបណ្ដឹងនៅប៉ុស្តិ៍ចោមចៅទី១ សុំឱ្យសមត្ថកិច្ចជួយស្រាវជ្រាវដើម្បីចាប់ក្រុមចោរប្លន់ទាំងនោះយកមកផ្ដន្ទាទោសតាមច្បាប់៕ដោយ៖វិចិត្រ
