រដ្ឋាភិបាលអ៊ុយក្រែននិងម៉ុលដាវី បានចេញសេចក្តីថ្លែងការណ៍ផ្ទៀងផ្ទាត់គ្នាទៅលើផែនការបែកធ្លាយរបស់រុស្ស៊ីដែលមានគម្រោងចង់វាយដណ្តើមកាន់កាប់ប្រទេសម៉ុលដាវី ដូចទៅនឹងអ៊ុយក្រែន។
ថ្លែងទៅកាន់មេដឹកនាំសហភាពអឺរ៉ុបនៅទីក្រុងប្រ៊ុចសែល លោក Zelensky បានឆ្លៀតហែកកកាយថា កាលពីពេលថ្មីៗនេះ លោកបានប្រាប់ប្រធានាធិបតីម៉ុលដាវី លោកស្រី Maia Sandu អំពីគម្រោងការសម្ងាត់រុស្ស៊ី។ លោក Zelensky បាននិយាយតាមរយៈអ្នកបកប្រែថា៖ “ខ្ញុំបានប្រាប់ម៉ុលដាវី ហើយយើងបានរកឃើញផែនការនៃការបំផ្លិចបំផ្លាញប្រទេសម៉ុលដាវី តាមរយៈពួកចារកម្មរុស្ស៊ី”។ ឯកសារនោះបានបង្ហាញអំពី “ពេលណា នរណាគេ និងរបៀប ដែលផែនការនឹងប្រព្រឹត្តទៅដើម្បីបំបែកលទ្ធិប្រជាធិបតេយ្យប្រទេសម៉ុលដាវី និងបង្កើតការគ្រប់គ្រងលើប្រទេសម៉ុលដូវីទាំងស្រុង”។ យ៉ាងណា លោកស្គីបានសង្កត់ធ្ងន់ថា ផែនការនេះគឺស្រដៀងគ្នាទៅនឹងផែនការដែលរុស្ស៊ីរៀបចំដើម្បីកាន់កាប់អ៊ុយក្រែន គ្រាន់តែមិនដឹងពីពេលវេលាដែលរុស្ស៊ីនឹងចាប់ផ្តើមប៉ុណ្ណោះ។
សេវាស៊ើបការណ៍សម្ងាត់ និងសន្តិសុខរបស់ម៉ុលដាវី បានឆ្លើយតបយល់ព្រមទៅនឹងការអត្ថាធិប្បាយរបស់ Zelensky។ ក្នុងនោះនិយាយថា តាំងពីព័ត៌មានដែលបង្ហាញដោយដៃគូអ៊ុយក្រែនរបស់យើង និងសកម្មភាពប្រតិបត្តិការរបស់ម៉ុលដាវី គឺរកឃើញដូចគ្នា រុស្ស៊ីមានគោលបំណងចង់ធ្វើឱ្យខូចដល់សាធារណរដ្ឋម៉ុលដូវី ធ្វើឲ្យមានអស្ថិរភាព និងការបំពានសណ្តាប់ធ្នាប់សាធារណៈ។
រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយបង្ការទុកកាលពីសប្តាហ៍មុនថា ម៉ុលដាវីនឹងប្រែក្លាយជាអ៊ុយក្រែនមួយទៀត គឺបណ្តាលមកពីការអុជអាលវាយតម្លៃរបស់លោកខាងលិច។ លោកខាងលិចបានគាំទ្រការបោះឆ្នោតជ្រើសតាំងមេដឹកនាំម៉ុលដាវីលោកស្រី Sandu នៅឆ្នាំ ២០២០ និងមានបំណងចង់យកប្រទេសនេះចូលទៅក្នុងអង្គការណាតូ បញ្ចូលប្រទេសម៉ុលដាវីជាមួយរូម៉ានី៕
ប្រភព៖DAILYMAIL
ប្រភពរូប៖DAILYMAIL
ប្រែសម្រួល៖សុខ តុលា
