ក្រោយបានធ្វើដំណើរចេញក្រៅប្រទេសទៅអឺរ៉ុបលើកនេះ ប្រធានាធិបតីអ៊ុយក្រែន លោកហ្សេឡិនស្គី បានសម្ដែងក្តីសង្ឃឹម និងភាពជឿជាក់ថា អឺរ៉ុបនឹងនៅឈរជាមួយខ្លួនរហូតដល់ទទួលបានជ័យជម្នះពីរុស្ស៊ី។
លោក Volodymyr Zelenskyy បានមានប្រសាសន៍ទៅកាន់អ្នកយកព័ត៌មាននៅក្នុងទីក្រុង Brussels កាលពីថ្ងៃព្រហស្បតិ៍ ក្នុងដំណើរទស្សនកិច្ចផ្លូវរដ្ឋក្រៅប្រទេសថា មេដឹកនាំអឺរ៉ុបមួយចំនួនបានសម្តែង “ការត្រៀមខ្លួន” ដើម្បីផ្គត់ផ្គង់ទីក្រុង Kyiv ជាមួយនឹងយន្តហោះចម្បាំងហើយ។ “អឺរ៉ុបនឹងនៅជាមួយយើងរហូតដល់ជ័យជម្នះរបស់យើង។ លោកស្គីបានលម្អិតថា “ខ្ញុំបានឮវាពីមេដឹកនាំអឺរ៉ុបមួយចំនួន… អំពីការត្រៀមខ្លួនផ្តល់អាវុធ និងជំនួយចាំបាច់ដល់យើង រួមទាំងយន្តហោះផងដែរ”។ “ខ្ញុំមានកិច្ចព្រមព្រៀងទ្វេភាគីមួយចំនួនហើយឥឡូវនេះ។ យើងនឹងលើកឡើងពីបញ្ហាយន្តហោះចម្បាំង និងយន្តហោះផ្សេងទៀត”។ ក្នុងឱកាសនោះដែរ Zelenskyy ក៏បានទទួលការអបអរសាទរពីសភាអឺរ៉ុប និងថែមទាំងបានជួបប្រជុំកំពូលជាមួយមេដឹកនាំទាំង ២៧ របស់សហភាពអឺរ៉ុប ដោយទទូចនៅក្នុងសុន្ទរកថាដ៏គួរឱ្យចាប់អារម្មណ៍ និងក្តុកក្តួលមួយថា ការប្រយុទ្ធរបស់ប្រទេសរបស់គាត់ជាមួយរុស្ស៊ី គឺជាសិទ្ធិសេរីភាពស្មើនឹងអឺរ៉ុបទាំងអស់ដែរ។
ថ្វីបើបែបណាក៏ដោយ មិនមានការបញ្ជាក់ភ្លាមៗពីបណ្តាប្រទេសអឺរ៉ុបណាមួយអំពីការសន្យាទាក់ទងនឹងយន្តហោះចម្បាំងដូចដែលអ៊ុយក្រែនលើកឡើងនោះទេ៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
