ភ្នំពេញ៖ស្ត្រីអាជីវករវ័យក្មេងម្នាក់ ត្រូវនគរបាលក្រសួងមហាផ្ទៃចាប់ខ្លួន កាលពីរសៀលថ្ងៃទី៩ ខែកុម្ភៈ ពាក់ព័ន្ធចេញសែកស្អុយ៣០ម៉ឺនដុល្លារ រួចត្រៀមបញ្ជូនទៅតុលាការ។
សមត្ថកិច្ចបានឱ្យដឹងថា ស្ត្រីសង្ស័យឈ្មោះ សិទ្ធិ គុណសក្តិនិតា អាយុ២៧ឆ្នាំ ជាអ្នកលក់ដូរ ស្នាក់នៅបុរីពិភពថ្មីចម្ការដូង១ ខណ្ឌដង្កោ។ ការចាប់ខ្លួនស្ត្រីខាងលើអនុត្តតាមដីការបស់ព្រះរាជអាជ្ញាតុលាការភ្នំពេញតាមបណ្តឹងម្ចាស់បំណុល។
ក្នុងពាក្យបណ្តឹងបានបញ្ជាក់ថា កាលពីដើមខែកញ្ញា ឆ្នាំ២០២២ ឈ្មោះ សិទ្ធិ គុណសក្តិនិតា អ្នករាប់អានជាមួយដើមបណ្តឹង បានខ្ចីលុយចំនួន៣០ម៉ឺនដុល្លារដើម្បីយកទៅពង្រីកលើមុខរបរ។ឈ្មោះសិទ្ធិគុណសក្តិនិតា បានប្រាប់ដើមបណ្តឹងថា “យកលុយបងឯងប្រើតែរយៈពេល២០ថ្ងៃប៉ុណ្ណោះខ្ញុំនឹងបង្វិលសងវិញហើយ”។
លុះដល់ថ្ងៃទី២១ ខែកញ្ញា ឈ្មោះ សិទ្ធិគុណសក្តិនិតា បានចេញមូលប្បទានបត្រ១សន្លឹករបស់ធនាគារ ដែលមានទឹកប្រាក់ចំនួន៣០ម៉ឺនដុល្លារឱ្យទៅដើមបណ្តឹង ដើម្បីទូទាត់បំណុល។ម្ចាស់លុយបានយកសែកនោះទៅបើកប្រាក់ ស្រាប់តែខាងធនាគារឆ្លើយតបថា មូលប្បទានបត្រនេះគ្មានសាច់ប្រាក់ទេ។ពេលនោះដើមបណ្តឹងសម្រេចប្តឹងទៅសមត្ថកិច្ចដើម្បីជួយចាត់ការតាមច្បាប់។
អង្គហេតុខាងលើនេះ ទើបនគរបាលក្រសួងមហាផ្ទៃចាប់ខ្លួនស្ត្រីអាជីវកររូបនោះត្រៀមបញ្ជូនទៅតុលាការដើម្បីបន្តនីតិវិធី៕ដោយ៖វិចិត្រ
