ភ្នំពេញៈវិស័យកសិកម្មកម្ពុជានៅតែជាវិស័យអាទិភាពសំខាន់មួយសម្រាប់ការអភិវឌ្ឍប្រទេសកម្ពុជា និងទទួលបានការគាំទ្រពីធនាគារ និងមីក្រូហិរញ្ញវត្ថុកម្ពុជា។ជាក់ស្ដែងវិស័យកសិកម្មកម្ពុជា បច្ចុប្បន្នបានស្រូបយកឥណទានពីធនាគារ៨ភាគរយ នៃឥណទានរបស់ធនាគារសរុប និងប្រមាណ២៥ភាគរយ នៃឥណទានសរុបក្នុងវិស័យមីក្រូហិរញ្ញវត្ថុ។
ថ្លែងនៅក្នុងសន្និសីទសារព័ត៌មានមួយ កាលពីថ្ងៃទី៧ កុម្ភៈ ២០២៣ លោករ័ត្ន សោភ័ណ អនុប្រធានសមាគមធនាគារនៅកម្ពុជាបានមានប្រសាសន៍ថា គិតមកដល់បច្ចុប្បន្ននេះ ឥណទានរបស់ធនាគារ ដែលបានផ្ដល់ក្នុងវិស័យកសិកម្ម មានទំហំទឹកប្រាក់ប្រមាណ៣,៧ពាន់លានដុល្លារអាមេរិក ហើយបណ្ដាធនាគារ នៅតែបន្តផ្ដល់កម្ចីដល់វិស័យកសិកម្ម បន្ថែមសម្រាប់ឱ្យវិស័យនេះ កាន់តែមានតែការ រីក លូតលាស់ និងរួមចំណែកដល់ការអភិវ ឌ្ឍសេដ្ឋកិច្ចបន្ថែម។
លោកបន្តថា ទឹកប្រាក់ដែលបានផ្ដល់ជូន ក្នុងវិស័យកសិកម្មនេះ ជាទឹកតួលេខច្រើនមួយ ក្នុងចំណោមបណ្ដាវិស័យផ្សេងៗទៀត ដែលទទួលបានឥណទានពីគ្រឹះស្ថានធនាគារ ដោយធនាគារមួយចំនួននៅតែបន្តផ្ដោតលើកសិកម្ម ហើយយុទ្ធសាស្ត្ររបស់គ្រឹះស្ថាន ធនា គារ យ៉ាងណានោះ យើងមិនអាចដឹងស៊ីជម្រៅ ពីយុទ្ធសាស្ត្ររបស់គ្រឹះស្ថានទាំងនោះដែរ ។
លោកសុខ វឿន ប្រធានសមាគមមីក្រូហិរញ្ញវត្ថុកម្ពុជា ក៏បានថ្លែងផងដែរថា សម្រាប់វិស័យមីក្រូហិរញ្ញវត្ថុវិញ ក៏បានផ្ដល់កម្ចីដល់វិស័យកសិកម្មរហូតដល់២៥ភាគរយ នៃឥណទានសរុបគិតជាទឹកប្រាក់ មានប្រមាណ១,៧ពាន់លានដុល្លារអាមេរិក ដោយក្នុងនោះមានទាំងឥណទានខ្នាតតូចៗនិងខ្នាតធំ ប៉ុន្តែភាគច្រើនគឺគ្រឹះស្ថានមីក្រូហិរញ្ញវត្ថុមួយចំនួន បានផ្ដល់ឥណទាន ក្នុងវិស័យកសិកម្មជាកម្ចីខ្នាតតូច ៗ សម្រាប់កសិករ ។
លោកបន្តថា បច្ចុប្បន្ននេះ មានក្រុមមួយចំនួនបានផ្ដល់ឥណទានទៅដល់ប្រជាពលរដ្ឋ ដោយមិនត្រឹមត្រូវស្របច្បាប់ ដែលជាកត្តាជំរុញឱ្យប្រជាពលរដ្ឋធ្លាក់ក្នុងវិបត្តិ ឬបំណុលកាន់តែច្រើន ដោយសារតែក្រុមផ្ដល់ឥណទានអត់ច្បាប់ទាំងនោះ បានយកការប្រាក់ពីអតិថិជនច្រើន និងមានលក្ខណៈគម្រាមកំហែងដល់អតិថិជន៕ដោយៈផាវី
