រដ្ឋាភិបាលអូស្រ្តាលីដកកាមេរ៉ាសុវត្ថិភាពផលិតដោយចិនទាំងអស់ចេញពីកន្លែងរដ្ឋាភិបាលសាធារណៈ ខណៈមានការភ័យខ្លាចផ្នែកសន្តិសុខជាតិ។
រដ្ឋមន្ត្រីក្រសួងការពារជាតិ និងជាឧបនាយករដ្ឋមន្ត្រីអូស្រ្តាលី Richard Marles នៅថ្ងៃព្រហស្បតិ៍សប្តាហ៍នេះបាននិយាយថា រដ្ឋាភិបាលនឹងស្វែងរក និងដកកាមេរ៉ាចេញពីទីតាំងផ្សេងៗរបស់រដ្ឋ ដើម្បីធ្វើឱ្យមានសុវត្ថិភាពទាំងស្រុង។ សមាជិកព្រឹទ្ធសភា Paterson ក៏បាន គាំទ្រនឹងគំនិតនេះ ដោយនិយាយថា អូស្ត្រាលីមិនគួរគាំទ្រកាមេរ៉ាដែលជាកម្មសិទ្ធិរបស់ក្រុមហ៊ុនចិន Hikvision និង Dahua សម្រាប់ហេតុផលសន្តិសុខ និងសីលធម៌នោះទេ។ លោកបាននិយាយថា ក្រុមហ៊ុនទាំងពីរបានជាប់ពាក់ព័ន្ធដោយផ្ទាល់នៅក្នុងការចោទប្រកាន់ពីការរំលោភសិទ្ធិមនុស្ស និងការតាមដានយ៉ាងច្រើនលើជនជាតិអ៊ុយហ្គួរនៅស៊ីនជាំង។ សវនកម្មនៃទីតាំងរដ្ឋាភិបាលអូស្ត្រាលីបានរកឃើញកាមេរ៉ា និងឧបករណ៍សុវត្ថិភាពរបស់ចិននេះមានទីតាំងនៅលើអគារជាង ២០០ខ្នង នៅស្ទើរតែគ្រប់នាយកដ្ឋាន រួមទាំងនាយកដ្ឋានកិច្ចការបរទេស និងនាយកដ្ឋានអគ្គមេធាវីអូស្ត្រាលីផងដែរ។
ជុំវិញការចោទប្រកាន់នេះ ក្រុមហ៊ុនចិន Hikvision បានឆ្លើយតបវិញថា ជារឿង “មិនពិត”។ អ្នកនាំពាក្យម្នាក់របស់ក្រុមហ៊ុនបាននិយាយថា៖ “គ្មានស្ថាប័នបច្ចេកទេសត្រូវបានវាយតម្លៃឈានដល់ការសន្និដ្ឋានបែបនេះទេ”។ ក្រុមហ៊ុននិយាយថា ខ្លួនមិនអាចចូលប្រើទិន្នន័យវីដេអូរបស់អ្នកប្រើប្រាស់ចុងក្រោយបានទេ ដូច្នេះហើយមិនអាចបញ្ជូនវាទៅភាគីទីបីបានឡើយ។
គួរជម្រាបថា មិនមែនមានតែអូស្រ្តាលីទេដែលបានប្រកាសបិទដំឡើងក្រុមហ៊ុនកាមេរ៉ាចិន ក៏ប៉ុន្តែកាលពីខែវិច្ឆិកាកន្លងទៅ អូស្រ្តាលី សហរដ្ឋអាមេរិកក្តី ក៏បានធ្វើដូច្នេះដែរ៕
ប្រភព៖BBC NEWS
ប្រភពរូប៖BBC NEWS
ប្រែសម្រួល៖សុខ តុលា
