ពោធិ៍សាត់៖កម្លាំងនគរបាលប្រឆាំងបទល្មើសសេដ្ឋកិច្ចខេត្តពោធិ៍សាត់ បានចុះបង្រ្កាបបទល្មើសនេសាទ ប្រភេទឧបករណ៍ឆក់ត្រីនិងរឹបអូសវត្ថុតាងជាច្រើន។
មន្ត្រីនគរបាលបានឱ្យដឹងថា ប្រតិបត្តិការចុះបង្រ្កាបបទល្មើសនេសាទខាងលើ នៅលើផ្ទៃទឹកបឹងទន្លេសាប ម្តុំផាត់សណ្ដោង ស្ថិតក្នុងភូមិរាំងទិល ឃុំរាំងទិល ស្រុកកណ្ដៀង ខេត្តពោធិ៍សាត់ កាលពីថ្ងៃទី៨ ខែកុម្ភៈ។
មន្ត្រីដដែលបានបន្តថា ជាលទ្ធផលកម្លាំងបានរឹបអូសឧបករណ៍នេសាទល្មើសច្បាប់ប្រភេទឆក់ត្រីមានអាគុយចំនួន៥-អាំងវែរទ័រមួយគ្រឿង-ដែកឆក់ត្រី៤គូ-ត្រីប្រមាណ១០គីឡូ-កាណូត២គ្រឿងនិងទូកមួយ។ចំណែកក្រុមជនល្មើសដែលកំពុងប្រព្រឹត្តបានលោតទឹកគេចខ្លួនបាត់អស់ពេលសមត្ថកិច្ចចុះទៅដល់។
ក្រោយពីដកហូតវត្ថុតាងបទល្មើសនេសាទ កម្លាំងបានយកទៅរក្សាទុកដើម្បីអនុវត្តតាមនីតិវិធីនិងបន្តស្វែងរកចាប់ជនល្មើសយកមកចាត់ការតាមច្បាប់៕ដោយ៖វិចិត្រ