នៅទីបំផុតរបាយការណ៍ស៊ើបអង្កេតអន្តរជាតិបានលាតត្រដាងថា លោកពូទីន ប្រធានាធិបតី រុស្ស៊ីគឺជាអ្នកនៅពីក្រោយការបញ្ជាឲ្យបាញ់ទម្លាក់យន្តហោះស៊ីវិលម៉ាឡេស៊ី MH17 កាលពីឆ្នាំ២០១៤។
ការសន្និដ្ឋានរបស់ក្រុមស៊ើបអង្កេតរួម ហៅកាត់ (JIT) បានរកឃើញនៅសប្តាហ៍នេះថា ប្រធានាធិបតីពូទីនគឺជាអ្នកនៅពីក្រោយសោកនាដកម្មធ្លាក់យន្តហោះ MH17 ជើងហោះហើរម៉ាឡេស៊ី សម្លាប់មនុស្ស២៩៨នាក់ កាលឆ្នាំ២០១៤។ របាយការណ៍បានរកឃើញថា នៅក្នុងការសន្ទនាតាមទូរសព្ទដែលបានថតទុក មន្ត្រីរុស្ស៊ីបាននិយាយថា ការសម្រេចចិត្តផ្តល់ជំនួយផ្នែកយោធាគឺស្ថិតនៅជាមួយប្រធានាធិបតី។ ការសម្រេចចិត្តនេះថែមទាំងត្រូវបានពន្យារពេលមួយសប្តាហ៍ទៀតផង “ព្រោះមានមនុស្សតែម្នាក់គត់ដែលអាចធ្វើការសម្រេចចិត្តបាន នោះគឺជាអ្នកស្ថិតនៅក្នុងកិច្ចប្រជុំកំពូលនៅប្រទេសបារាំង”។
កាលនោះ គឺនៅថ្ងៃទី ៥ និង ៦ ខែមិថុនា ឆ្នាំ ២០១៤ គឺជាពេលដែលលោកប្រធានាធិបតី Putin បានស្ថិតនៅក្នុងប្រទេសបារាំង ដើម្បីប្រារព្ធទិវាខួបនៃសម្ព័ន្ធមិត្តក្នុងអំឡុងសង្គ្រាមលោកលើកទីពីរ។ “មានព័ត៌មានជាក់លាក់ដែលថា សំណើរបស់ពួកបំបែកខ្លួននៅដូណេត ត្រូវបានបញ្ជូនទៅកាន់ប្រធានាធិបតី ហើយត្រូវបានយល់ព្រម។ តាមការស៊ើបអង្កេត គេមិនបានរកឃើញលម្អិតទេ ក៏ប៉ុន្តែបន្តិចក្រោយមក ប្រព័ន្ធការពារដែនអាកាសធុនធ្ងន់រុស្ស៊ីក៏បានលេចឡើង និងបាញ់ទម្លាក់យន្តហោះពាណិជ្ជកម្មស៊ីវិល MH17 ដែលកំពុងហោះឆ្លងកាត់។ ជុំវិញរបាយការណ៍នេះ ទីក្រុងមូស្គូមិនទាន់ផ្តល់ការឆ្លើយតបទេ៕
ប្រភព៖Ukrainska Pravda
ប្រភពរូប៖Ukrainska Pravda
ប្រែសម្រួល៖សុខ តុលា
