ភ្នំពេញ៖បុរស២នាក់ជិះម៉ូតូឌុបគ្នាតាមផ្លូវបេតុងឆ្លងមកផ្លូវធំ ត្រូវរថយន្តស្ទូចបុករួចអូសជាច្រើនម៉ែត្របណ្តាលឱ្យរងរបួសធ្ងន់ទាំង២នាក់។ហេតុការណ៍នេះបានកើតឡើងនៅតាមផ្លូវ២១៧ ក្នុងសង្កាត់ជើងឯក ខណ្ឌដង្កោ កាលពីរំលងអធ្រាត្រឈានចូលថ្ងៃទី៩ ខែកុម្ភៈ។
សាក្សីបានឱ្យដឹងថា មុនកើតហេតុ គេឃើញបុរស២នាក់ជិះម៉ូតូហុងដាឌ្រីមផ្លាកលេខកំពង់ចាម1X- 5326 ឌុបគ្នាចេញពីផ្លូវបេតុងចាក់សំរាមពីជើងទៅត្បូងឆ្ពោះទៅផ្លូវធំ។មកដល់កន្លែងខាងលើមានរថយន្តស្ទូចដឹកផ្ទះចល័ត ផ្លាកលេខភ្នំពេញ3D-4663 ជ្រុលបុកម៉ូតូនិងអូសជាច្រើនម៉ែត្រ បណ្ដាលឱ្យរងរបួសធ្ងន់ទាំង២នាក់។
បន្ទាប់ពីកើតហេតុ អ្នកបើកបរបានឈប់រថយន្តរួចរត់ចូលក្នុងព្រៃបាត់។ក្រោយមករថយន្តសាមុយបានមកដឹកជនរងគ្រោះទៅមន្ទីរពេទ្យសង្គ្រោះភ្លាមៗ។ រីឯរថយន្តនិងម៉ូតូត្រូវជំនាញចរាចរណ៍ខណ្ឌដង្កោនាំទៅទុកដើម្បីដោះស្រាយពេលក្រោយ៕ដោយ៖វិចិត្រ
