ភ្នំពេញ៖គ្រោះថ្នាក់ចរាចរដោយបុរស៣នាក់បានជិះម៉ូតូឌុបគ្នាយ៉ាងលឿនដើម្បីគេចពីក្រុមក្មេងស្ទាវ ក៏ជ្រុលទៅបុកកុងតឺន័រកំពុងចត បណ្ដាលឱ្យស្លាប់ម្នាក់ របួសធ្ងន់២នាក់។ហេតុការណ៍ដ៏រន្ធត់នេះបានកើតឡើងនៅតាមផ្លូវ៣០ម៉ែត្រ ក្នុងសង្កាត់ចោមចៅទី១ ខណ្ឌពោធិ៍សែនជ័យ កាលពីរំលងអធ្រាត្រឈានចូលថ្ងៃទី៩ ខែកុម្ភៈ។
អ្នកឃើញហេតុការណ៍បានឱ្យដឹងថា ដំបូងរថយន្តកុងតឺន័របានចតលើចិញ្ចើមផ្លូវ៣០ម៉ែត្រពីជើងទៅត្បូង។ពេលនោះស្រាប់តែមានបុរស៣នាក់ជិះម៉ូតូឌុបគ្នាយ៉ាងលឿនទៅបុករថយន្តកុងតឺន័រពីក្រោយពេញទំហឹងបណ្ដាលឱ្យស្លាប់ម្នាក់ រងរបួសធ្ងន់២នាក់ ត្រូវបានរថយន្តដឹកទៅមន្ទីរពេទ្យសង្គ្រោះបន្ទាន់។
បន្ទាប់ពីកើតហេតុ សមត្ថកិច្ចជំនាញចរាចរណ៍ចុះមកវាស់វែង ហើយយករថយន្តកុងតឺន័រនិងម៉ូតូទៅទុករង់ចាំតំណាងភាគីចូលខ្លួនដោះស្រាយពេលក្រោយ៕ដោយ៖វិចិត្រ
