ប្រទេសចិនអំពាវនាវសុំឲ្យអាម៉េរិក ប្រគល់កម្ទេចកម្ទីបាឡុងរបស់ខ្លួនដែលត្រូវបានបាញ់ទម្លាក់នោះមកវិញ ដើម្បីបង្ហាញពីភាពស្មោះត្រង់នៅក្នុងជម្លោះ។
![](https://cambodiaflashnews.com/wp-content/uploads/2021/06/top-banner.gif)
នេះបើតាមសម្ដីរបស់អ្នកការទូតចិនម្នាក់។ អ្នកការទូតនោះគឺជាឯកអគ្គរដ្ឋទូតចិនប្រចាំនៅប្រទេសបារាំង លោក Lu Shaye។ លោកបាននិយាយក្នុងបទសម្ភាសន៍កាលពីថ្ងៃចន្ទជាមួយទូរទស្សន៍បារាំង LCI ថា “ប្រសិនបើមនុស្សម្នាក់រើសរបស់មួយនៅតាមផ្លូវ ហើយដឹងថាម្ចាស់ជានរណា អ្នកនោះគួរតែប្រគល់វាទៅម្ចាស់គេវិញ”។ លោកLu បានចោទប្រកាន់រដ្ឋាភិបាលសហរដ្ឋអាម៉េរិកថាបាននិយាយបំផ្លើសលើបញ្ហាបាឡុងថាជាចារកម្ម ខណៈមន្ត្រីចិនអះអាង ដដែលៗហើយថាជាឧបករណ៍ផ្នែកមួយនៃកិច្ចខិតខំប្រឹងប្រែងស្រាវជ្រាវឧតុនិយមស៊ីវិល មិនមែនជាចារកម្មទេ។
យោងតាមលោក Lu ការបដិសេធជាក់ស្តែងរបស់រដ្ឋាភិបាលសហរដ្ឋអាម៉េរិកក្នុងការប្រគល់ កម្ទេចកម្ទីបាឡុងទៅឱ្យជនជាតិចិន គឺជាភស្តុតាងដែលបង្ហាញថាប្រទេសនេះ “មិនស្មោះត្រង់” នៅក្នុងទំនាក់ទំនងតានតឹងរបស់ខ្លួនជាមួយប្រទេសចិនឡើយ។ សម្រង់សម្ដីលោក Lu “បាឡុងនេះគឺជារឿងធម្មតាណាស់” “វាមិនមែនជារឿងចម្លែកទេក្នុងការឃើញបាឡុងចារកម្មអាម៉េរិក ឬបាឡុងដែលប្រើសម្រាប់គោលបំណងផ្សេងទៀត” ។
សូមរំលឹកម្តងទៀតថា ប្រធានបទចារកម្មបានផ្ទុះឡើងកាលពីសប្តាហ៍មុន នៅពេលដែលមន្ត្រីមន្ទីរបញ្ចកោណបានបញ្ជាក់ថា ឧបករណ៍ពណ៌សអាថ៌កំបាំងត្រូវបានគេប្រទះឃើញនៅលើរដ្ឋភាគខាងលិចដែលងាយរងគ្រោះ។ ឧបករណ៍នោះចុងក្រោយត្រូវបានបាញ់ទម្លាក់ដោយយន្តហោះចម្បាំងរបស់សហរដ្ឋអាម៉េរិកនៅឯឆ្នេរសមុទ្រ Myrtle Beach រដ្ឋ South Carolina កាលពីថ្ងៃទី៤ ខែកុម្ភៈ ខណៈកម្ទេចកម្ទីផ្នែកខ្លះត្រូវបានស្រង់ចេញដោយបុគ្គលិកកងទ័ពជើងទឹកអាម៉េរិក៕
ប្រភព៖New York Post
ប្រភពរូប៖New York Post
ប្រែសម្រួល៖សុខ តុលា