រុស្ស៊ីចោទអ៊ុយក្រែនថាបានប្រើប្រាស់អាវុធគីមីជីវសាស្រ្តនៅក្នុងសមរភូមិជិតទីក្រុង Soledar និង Bakhmut ភាគខាងកើតប្រទេសអ៊ុយក្រែន ខណៈដែលអ៊ុយក្រែនថារុស្ស៊ីចូលចិត្តបង្កើតព័ត៌មានមិនពិត។
គណៈកម្មាធិការស៊ើបអង្កេតរបស់រុស្ស៊ី បាននិយាយថា សាធារណរដ្ឋប្រជាមានិត Donetsk ដែលជាភ្នាក់ងារមួយរបស់រុស្ស៊ីនៅក្នុងទឹកដីដែលខ្លួនបានរឹបអូស និងកាន់កាប់បានរាយការណ៍អំពីការប្រើប្រាស់អាវុធគីមីដោយយន្តហោះគ្មានមនុស្សបើករបស់អ៊ុយក្រែន នៅជិតទីតាំងទាំងពីរ មួយគឺនៅ Soledar ក្រុងរ៉ែអំបិល និងមួយទៀតគឺទីក្រុង Bakhmut ។ ការចោទប្រកាន់នេះមិនមានភ្ជាប់ដោយភស្តុតាងណាមួយត្រូវបានចេញផ្សាយជាសាធារណៈនោះទេ ប៉ុន្តែគណៈកម្មាធិការរុស្ស៊ីបានចង្អុលបង្ហាញថា “ជាលទ្ធផល កងកម្លាំងប្រដាប់អាវុធរុស្ស៊ីកំពុងជួបប្រទះនឹងការចុះខ្សោយនៃសុខភាព រោគសញ្ញាលក្ខណៈនៃការពុល”។ ហើយចំពោះអាការនៃការពុល ប្រភពនេះមិនបានលម្អិតឡើយ។
ឆ្លើយតបជាមួយគ្នា កងកម្លាំងប្រដាប់អាវុធរបស់អ៊ុយក្រែនបាននិយាយថា ពួកគេបានប្រកាន់ខ្ជាប់នូវច្បាប់សង្រ្គាមយ៉ាងខ្ជាប់ខ្ជួនណាស់។ ការិយាល័យកិច្ចការសាធារណៈបាននិយាយនៅក្នុងសេចក្តីថ្លែងការណ៍តាមអ៊ីមែលថា “ការចោទប្រកាន់របស់សត្រូវចំពោះការប្រើប្រាស់អាវុធគីមីដោយអង្គភាពនៃកងកម្លាំងប្រដាប់អាវុធអ៊ុយក្រែនគឺមិនពិតទេ” ។ “អ៊ុយក្រែនមិនដែលប្រើអាវុធបែបនេះនៅកន្លែងណា… នៅពេលណាមួយឡើយ”។ ថ្មីៗនេះ ចារកម្មអ៊ុយក្រែនក៏បានស៊ើបដឹងថា ទ័ពរុស្ស៊ីកំពុងមានអាការរាករូស និងក្តៅខ្លួនដែរ ប៉ុន្តែនោះគឺអាចមកពីពួកគេកង្វះខាតអនាម័យដោយខ្លួនឯង៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា
