កំពង់ចាម៖ក្មេងប្រុសម្នាក់បានជិះម៉ូតូយ៉ាងលឿន ជ្រុលទៅបុករថយន្តកំពុងចតលើចិញ្ចើមផ្លូវ បណ្តាលឱ្យស្លាប់នៅនឹងកន្លែង។គ្រោះថ្នាក់នេះបានកើតឡើងនៅលើផ្លូវជាតិលេខ៦ ក្នុងភូមិភ្នំដិល ឃុំតាំងក្រាំង ស្រុកបាធាយ ខេត្តកំពង់ចាម កាលពីរសៀលថ្ងៃទី៧ ខែកុម្ភៈ។
![](https://cambodiaflashnews.com/wp-content/uploads/2021/06/top-banner.gif)
មន្រ្តីនគរបាលបានឱ្យដឹងថា មុនកើតហេតុ មានម៉ូតូម៉ាកហុងដា ផ្លាកលេខ កំពង់ចាម 1AD-7376 បើកបរដោយឈ្មោះ សៀន វិសិដ្ឋ អាយុ១៧ឆ្នាំ នៅភូមិទួលចាន់ ឃុំច្បារអំពៅ ស្រុកបាធាយ ខេត្តកំពង់ចាម។
មកដល់កន្លែងខាងលើ ម៉ូតូបានបុករថយន្តម៉ាកហ៊ីយ៉ាន់ដាយផ្លាកលេខសៀមរាប 3A-0030 ឈប់ចតនៅចិញ្ចើមផ្លូវពីក្រោយពេញទំហឹងបណ្តាលឱ្យដួលបោកក្បាលស្លាប់តែម្តង។ចំណែកអ្នកបើកបររថយន្តក្រោយហេតុការណ៍កើតឡើងបានរត់គេចខ្លួនបាត់។
សមត្ថកិច្ចបានយកម៉ូតូនិងរថយន្តទៅទុកបណ្ដោះអាសន្ននៅអធិការដ្ឋាននគរបាលស្រុកបាធាយរង់ចាំដោះស្រាយពេលក្រោយ៕ដោយ៖វិចិត្រ