ពិតជាគួរឲ្យរន្ធត់ អ្នកស្លាប់ឡើងដល់ជិត ៨.០០០នាក់ហើយ ដោយសារគ្រោះរញ្ជួយដីនៅប្រទេសតួកគី និងស៊ីរីនៅដើមសប្តាហ៍នេះ។
យោងតាមប្រភព NBC បានឲ្យដឹងនៅថ្ងៃពុធនេះថា មនុស្សយ៉ាងហោចណាស់៧.៩០០នាក់ហើយ ខណៈតួកគីមាន ៥.៨៩៤ និងស៊ីរី ២.០៣២ នាក់។ យោងតាមអាជ្ញាធរតួកគី ប្រតិបត្តិការសង្រ្គោះកំពុងបន្តយ៉ាងមមាញឹកជាទីបំផុត មានការចូលរួមពីបុគ្គលិកស្វែងរក និងជួយ សង្គ្រោះតួកគីជាង ១២.០០០នាក់ កំពុងធ្វើការនៅក្នុងតំបន់ដែលរងផលប៉ះពាល់ រួមជាមួយនឹងទាហាន ៩.០០០ នាក់ ប្រទេសសហការជាង ៧០ បានផ្តល់ក្រុមជួយសង្គ្រោះ និងជំនួយផ្សេងទៀត។
ជាមួយគ្នានេះមន្ត្រីអង្គការសហប្រជាជាតិបាននិយាយថា ប្រទេសទាំងពីររងគ្រោះដូចគ្នា តែស៊ីរីហាក់ដុនដាបខ្លាំងជាង ព្រោះសូម្បីតែមុនពេលរញ្ជួយដី ប្រជាជនជិត ៧០ភាគរយ គឺបានត្រូវការជំនួយមនុស្សធម៌រួចទៅហើយ។ អង្គការសុខភាពពិភពលោក ក៏បានព្រមានទុកជាមុនថា អ្នកស្លាប់អាចកើនដល់២ម៉ឺននាក់។
សូមជម្រាបជាថ្មីថា គ្រោះរញ្ជួយដីបានកើតឡើងកាលពីថ្ងៃចន្ទ វេលាទៀបភ្លឺ នៅភាគខាងត្បូងប្រទេសតួកគី និងខាងជើងស៊ីរី។ កម្រិតរញ្ជួយត្រូវបានវាស់ដោយភ្នាក់ងារអាមេរិក ៧.៨រិចឆ្ទ័រ ជាកម្រិតខ្លាំងបំផុតប្រចាំសតវត្ស៕
ប្រភព៖NBC NEWS
ប្រភពរូប៖NBC NEWS
ប្រែសម្រួល៖សុខ តុលា
