ភ្នំពេញ៖ក្នុងឆ្នាំ២០២២កន្លងទៅនេះប្រទេសកម្ពុជាសម្រេចបាននូវទំហំពាណិជ្ជកម្មជិត៤៨ពាន់លានដុល្លារអាមេរិកក្នុងនោះការនាំចេញមានទំហំ ២២ពាន់លានដុល្លារ និងការនាំចូលមានទំហំជាង ២៥ពាន់លានដុល្លារអាមេរិក។ នេះបើយោងតាមទិន្នន័យផ្លូវការចេញផ្សាយដោយ អគ្គនាយកដ្ឋានគយ និងរដ្ឋាករកម្ពុជា។
ប្រភពដដែលនេះ បានគូសបញ្ជាក់ឲ្យដឹងថា ក្នុងទំហំពាណិជ្ជកម្មនៅឆ្នាំ ២០២២នេះ កម្ពុជា សម្រេចបានការនាំចេញជាង ២២ពាន់លានដុល្លារអាមេរិក ដែលកើនឡើង ១៦% ខណៈនៅពេលដូចគ្នា ឆ្នាំ ២០២១ កម្ពុជា នាំចេញទៅកាន់ទីផ្សារអន្តរជាតិត្រឹមតែ ១៩ពាន់លានដុល្លារអាមេរិក។
សម្រាប់ការនាំចេញផលិតផលកាត់ដេរមានកំណើន ១៤%, ផលិតផលវិនិយោគមិនមែនកាត់ដេរ ដូចជា គ្រឿងបំណែកអេឡិចត្រូនិក បង្គុំខ្សែភ្លើង ផលិតផលពីឈើ ផលិតផលប្លាស្ទិច គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត មានកំណើន ២៦%, និងកសិផលមានកំណើន ៦%។
ចំណែក ការនាំចូលមកវិញក្នុងរយៈពេល ១២ខែនេះ កម្ពុជា បាននាំចូលទំនិញប្រមាណ ២៥ពាន់លានដុល្លារអាមេរិក ដែលមានការកើនឡើងប្រហែល ១១% ហើយវាបានធ្វើឲ្យ កម្ពុជា មានឱនភាពពាណិជ្ជកម្មប្រមាណ ៣ពាន់លានដុល្លារអាមេរិក ដែលក្នុងនោះទំនិញនាំចូលសំខាន់ៗ មានដូចជា យានយន្តនិងគ្រឿងចក្រ, វត្ថុធាតុដើមនិងគ្រឿងម៉ាស៊ីនបម្រើដល់គម្រោងវិនិយោគ, គ្រឿងសំណង់ និងទំនិញចម្រុះផ្សេងទៀត។
ទន្ទឹមគ្នានេះ ប្រទេសចិន នៅតែជាដៃគូពាណិជ្ជកម្មដ៏ធំជាងគេរបស់កម្ពុជា ដែលមានទំហំពាណិជ្ជកម្មទ្វេភាគីប្រមាណ ១១ពាន់លានដុល្លារអាមេរិក កើនឡើង ៤% តែកម្ពុជា មានឱនភាពពាណិជ្ជកម្មជាង ៩ពាន់ ២រយលានដុល្លារអាមេរិក។
រីឯសហរដ្ឋអាមេរិក ឈរនៅលំដាប់លេខ ២ ដែលមានទំហំពាណិជ្ជកម្មទ្វេភាគីជាមួយកម្ពុជា គិតជាទឹកប្រាក់ប្រមាណ ៩ពាន់លានដុល្លារអាមេរិក កើនឡើង ១៨% ដោយក្នុងនោះ កម្ពុជា នាំចេញទំនិញទៅកាន់អាមេរិកជាង ៨ពាន់ ៩រយលានដុល្លារអាមេរិក ខណៈកម្ពុជា នាំចូលមកត្រឹមតែ ៣១២លានដុល្លារអាមេរិក មានន័យថា កម្ពុជា សម្រេចនូវអតិរេកពាណិជ្ជកម្មជាង ៨ពាន់ ៦រយលានដុល្លារអាមេរិក៕
ដោយៈសិរីមតី
