ភ្នំពេញ៖រថយន្តកុងតឺន័របានបើកកៀរម៉ូតូឱ្យដួល ហើយខ្ទាតមនុស្សចូលក្រោមកង់ បណ្តាលឱ្យកិនបុរសម្នាក់បែកក្បាលចេញខួរស្លាប់មួយរំពេច។គ្រោះថ្នាក់ចរាចរដ៏រន្ធត់នេះបានកើតឡើងនៅផ្លូវចោមចៅ មុខសាលារៀនប៊ែលធី ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ កាលពីយប់ថ្ងៃទី៧ ខែកុម្ភៈ។
សមត្ថកិច្ចប្រចាំគោលដៅបានឱ្យដឹងថា ជនរងគ្រោះដែលស្លាប់ឈ្មោះ ពិន សុខណា អាយុ២៦ឆ្នាំ កន្លែងកំណើត ភូមិឡាំឡូង ឃុំជ្រៃឃ្មុំ ស្រុកស៊ីធកណ្តាល ខេត្តព្រៃវែង។ មុនកើតហេតុ គេបានឃើញបុរសម្នាក់ជិះម៉ូតូម៉ាកហុងដាឌ្រីម ផ្លាកលេខភ្នំពេញ1GX 3294 តាមផ្លូវចោមចៅ ពីកើតទៅលិច។
មកដល់កន្លែងខាងលើ ស្រាប់តែមានរថយន្តកុងតឺន័រផ្លាកលេខភ្នំពេញ3D 1881 បើកមកពីក្រោយកៀរម៉ូតូនោះឱ្យដួលហើយខ្ទាតមនុស្សចូលក្រោមកង់កិនបែកក្បាលចេញខួរស្លាប់យ៉ាងអាណោចអាធ័ម។ ភ្លាមនោះរថយន្តបង្កបានបន្តបើកប៉ងគេចខ្លួនទៅដល់មុខបុរីសែនមនោរម្យ ផ្លូវជាតិលេខ៤ សង្កាត់ចោមចៅទី៣ ខណ្ឌពោធិ៍សែនជ័យ ត្រូវអ្នកដំណើរដេញចាប់បានទាំងតៃកុងនិងរថយន្តយកប្រគល់ឱ្យសមត្ថកិច្ច៕ដោយ៖វិចិត្រ
