ភ្នំពេញ៖កម្លាំងនគរបាលក្រសួងមហាផ្ទៃ បានស្រាវជ្រាវចាប់ជនសង្ស័យប្ដីនិងប្រពន្ធ ករណីសម្លាប់បុរសម្នាក់កាលពីជាងមួយខែមុន ហើយរត់គេចខ្លួន។
![](https://cambodiaflashnews.com/wp-content/uploads/2021/06/top-banner.gif)
មន្ត្រីជំនាញបានឱ្យដឹងថា ជនសង្ស័យប្ដីប្រពន្ធនេះពាក់ព័ន្ធករណីឃាតកម្មលើបុរសម្នាក់បណ្ដាលឱ្យស្លាប់ កាលពីចុងឆ្នាំ២០២២ ត្រូវបាននគរបាលក្រសួងមហាផ្ទៃស្រាវជ្រាវចាប់ខ្លួននាព្រឹកថ្ងៃទី៦ ខែកុម្ភៈ នៅត្រង់ផ្លូវ១៣០ ខណ្ឌព្រែកព្នៅ។
ជនសង្ស័យទាំង២នាក់ឈ្មោះ ពេជ្យ ជីវ័ន្ត អាយុ៣៨ឆ្នាំ ជាជាងសំណង់ និងស្រ្តីជាប្រពន្ធ ឈ្មោះ ដា យ៉ា អាយុ៣០ឆ្នាំ។ ក្រោយពីសាកសួរ ជនសង្ស័យបានសារភាពថា ខ្លួនពិតជាបានកាប់ជនរងគ្រោះឱ្យដាច់កស្លាប់ពិតមែន ដោយសារតែប្រពន្ធបានទាក់ទងជាមួយជនរងគ្រោះទើបផ្ទុះការប្រចណ្ឌ ខ្លួនរៀបគម្រាងសម្លាប់តែម្ដង។
គួរបញ្ជាក់ថា កាលពីថ្ងៃទី២៦ ខែធ្នូ ឆ្នាំ២០២២ គេប្រទះឃើញសពបុរសម្នាក់ស្លាប់ក្នុងថ្លុកឈាមនៅកន្លែងលាងរថយន្តមួយត្រង់ច្រកចូលផ្សារទំនើបជីបម៉ុង ក្នុងភូមិថ្មី ខណ្ឌដង្កោ។ អំពើឃាតកម្មនេះជនសង្ស័យកាប់កំភួនជើង-ចំពីលើក្បាល និងចំកឱ្យដាច់ស្លាប់។បច្ចុប្បន្នកម្លាំងក្រសួងមហាផ្ទៃបានប្រគល់ជនសង្ស័យទៅនគរបាលខណ្ឌដង្កោ ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី៕ដោយ៖វិចិត្រ