ភ្នំពេញ៖រដ្ឋាភិបាលស្វីសបានជួយគាំទ្រផ្នែកហិរញ្ញវត្ថុ៤លានហ្វ្រង់ស្វីសឬជាង៤លានដុល្លារក្នុង១ឆ្នាំដល់មន្ទីរពទ្យគន្ធបុប្ផាក្នុងរយៈពេល៤ឆ្នាំ ចាប់ពីឆ្នាំ២០១៩ ដល់ឆ្នាំ២០២៣។ ក្នុងកិច្ចពិគ្រោះយោបល់ទ្វេភាគីលើកទី៣នាពេលថ្មីៗនេះរដ្ឋាភិបាលប្រទេសស្វ៊ីស បានប្រកាសថាខ្លួនបន្តគាំទ្រដល់មន្ទីរពេទ្យគន្ធបុប្ផាបន្តទៀត។
![](https://cambodiaflashnews.com/wp-content/uploads/2021/06/top-banner.gif)
ការប្រកាសបន្តជួយនេះ បានត្រូវបញ្ចេញឱ្យដឹងនៅក្នុងជំនួបរវាងលោក ចែម វីឌ្យ៉ា រដ្ឋលេខាធិការក្រសួងការបរទេសកម្ពុជា និងលោក ហែនរីហ្ស ឆេលិនប៊ែល រដ្ឋលេខាធិការទទួលបន្ទុកអាស៊ីប៉ាស៊ីហ្វិក នៃក្រសួងការបរទេសស្វ៊ីស។
សេចក្ដីប្រកាសព័ត៌មានរបស់ក្រសួងការបរទេសកម្ពុជាស្តីពីលទ្ធផលនៃជំនួបទ្វេភាគីនេះ បានឱ្យដឹងថា ក្រៅពីបន្តជំនួយដល់មន្ទីរពេទ្យគន្ធបុប្ផា រដ្ឋាភិបាលស្វ៊ីស ក៏គាំទ្រកម្មវិធីកិច្ចសហប្រតិបត្តិការថ្មីនៅក្នុងតំបន់មេគង្គឆ្នាំ ២០២២-២០២៥ ផងដែរ។
យោងតាមប្រភពដដែល ក្រៅពីបន្តការគាំទ្រតាំង២ខាងលើនេះ លោក ចែម វីឌ្យ៉ា បានស្នើទៅកាន់ភាគីស្វ៊ីស ឱ្យមានការរៀបចំវេទិកាធុរកិច្ច រវាងសភាពាណិជ្ជកម្មប្រទេសទាំងពីរ និងបន្តពិភាក្សាលទ្ធភាពបង្កើតឱ្យមានកិច្ចព្រមព្រៀងពាណិជ្ជកម្មសេរីផងដែរ។ ការស្នើពីភាគីកម្ពុជានេះ គឺដើម្បីបង្កើនទំហំពាណិជ្ជកម្មប្រទេសទាំងពីរ ឱ្យកាន់តែប្រសើរថែមទៀត។
ជុំវិញទំហំពាណិជ្ជកម្មរវាងកម្ពុជា-ស្វ៊ីសនេះ លោករដ្ឋលេខាធិការ ចែម វីឌ្យ៉ា កត់សម្គាល់ឃើញថា វិស័យពាណិជ្ជកម្ម និងវិនិយោគ បន្តកើនឡើង បើទោះជាញាំញីដោយជំងឺកូវីដ-១៩ ក្នុងរយៈពេល៣ឆ្នាំកន្លងមកនេះ។
ទាក់ទិននឹងទំហំពាណិជ្ជកម្មនេះ ក្នុងឆ្នាំ២០២០ ទំហំពាណិជ្ជកម្មសរុបរវាងកម្ពុជា និងស្វ៊ីស សរុបជាង ៣៧៩លានដុល្លារ។ ឯឆ្នាំ២០២១ សរុបចំនួនជាង ៩៧៤លានដុល្លាអាមេរិក និងឆ្នាំ២០២២សរុបចំនួនជាង ១,៤៤៥លានដុល្លារ។ តួលេខទាំងបីឆ្នាំខាងលើនេះជាតួលេខបណ្ដោះអាសន្ន នៃស្ថិតិពាណិជ្ជកម្មទំនិញអន្តរជាតិ របស់អគ្គនាយកដ្ឋានគយ និងរដ្ឋាករកម្ពុជាុ៕ដោយៈសិរីមតី