ភ្នំពេញ៖បើតាមរបាយការណ៍ពីក្រសួងពាណិជ្ជកម្ម បង្ហាញថា ការនាំចូលជីកសិកម្ម និងថ្នាំសម្លាប់សត្វល្អិតឬស្មៅ នៅពេញមួយឆ្នាំ២០២២ មានទំហំទឹកប្រាក់ប្រមាណ ៤៨០លានដុល្លារ មានការកើនឡើង ៦% បើធៀបនឹងរយៈពេលដូចគ្នាកាលពីឆ្នាំ២០២១។
លោក ហួរ ធីនាង ប្រធានគ្រប់គ្រងទូទៅផ្នែកជីថ្នាំកសិកម្មនៃក្រុមហ៊ុនអង្គរហ្គ្រីន បានគូសបញ្ជាក់ថា តម្រូវការប្រើប្រាស់ជី និងថ្នាំកសិ កម្ម របស់ប្រជាកសិករ នៅក្នុងឆ្នាំ២០២២ ហាក់មានការថយចុះខ្លាំងគួរឲ្យកត់សម្គាល់ ដោយសារតែកសិផលរបស់កសិករ ដែលទទួលបាន មិនសូវមានទីផ្សារល្អប្រសើរ ធ្វើឲ្យពួកគាត់ត្រូវកាត់បន្ថយការចំណាយច្រើនលើថ្លៃដើមផលិត ពិសេសការប្រើប្រាស់ជីនេះតែម្ដង។
យ៉ាងណាក៏ដោយចុះ លោក ហួរ ធីនាង បញ្ជាក់បន្ថែមថា បច្ចុប្បន្នតម្លៃជី-ថ្នាំកសិកម្មមួយចំនួន ហាក់មានការធ្លាក់ថ្លៃជាងមុនតិចតួច ក្នុងរង្វង់ប្រមាណ ១០% ។ បើតាមអ្នកជំនាញរូបនេះ ការធ្លាក់ថ្លៃនេះ ក៏ដោយសារតែតម្រូវការជី-ថ្នាំកសិកម្ម របស់ប្រជាពលរដ្ឋមានការថយចុះជាងមុន ទើបតាមបណ្តាលក្រុមហ៊ុនលក់ជី-ថ្នាំកសិកម្មភាគច្រើនបញ្ចុះតម្លៃលក់យ៉ាងដូច្នេះ ដើម្បីកុំឱ្យមានការកកស្ទះក្នុងស្តុកច្រើន។ លោកបានបន្ថែមថា ទន្ទឹមនឹងការលក់ចេញឱ្យប្រជាកសិករមានការចុះថ្លៃ ការនាំចូលជីកសិកម្មស្តង់ដារមួយចំនួនក៏មានតម្លៃទាបជាងមុនបន្តិចដែរ ខណៈមួយចំនួនទៀតមានតម្លៃថេរដដែល៕ដោយៈសុភក្រ្តា
