ស្ទឹងត្រែង៖លោកស្រី ហ៊ុន ដានី រដ្ឋលេខាធិការក្រសួងទេសចរណ៍ បានអញ្ជើញចូលរួមកម្មវិធីសិក្ខាសាលាផ្សព្វផ្សាយការអនុវត្តគោល នយោបាយលើកកម្ពស់សិទ្ធិតួនាទីតម្លៃស្ត្រីក្នុងវិស័យទេសចរណ៍នៅខេត្តស្ទឹងត្រែងកាលពីព្រឹកថ្ងៃទី៣ខែកុម្ភៈឆ្នាំ២០២៣។
សិក្ខាសាលានេះក៏មានការចូលរួមពីលោកស្រីកែវ សាវឿន អភិបាលរងខេត្តស្ទឹងត្រែង លោក អ៊ន់ ប៉ោសឿន ប្រធានមន្ទីរទេសចរណ៍ខេត្តនិងតំណាងអង្គភាពជុំវិញខេត្ត។
លោកស្រី ហ៊ុន ដានី បានមានប្រសាសន៍ថា ខេត្តស្ទឹងត្រែងគឺជាខេត្តកូនក្រមុំលើវិស័យទេសចរណ៍នៅភូមិភាគឦសាដែលជាប់តំបន់ព្រំដែនកម្ពុជាឡាវ។ខេត្តភូមិភាគឦសានមួយនេះមានដងទន្លេសំបូរទៅដោយធម្មជាតិ។មានផ្លូវតភ្ជាប់ពីខេត្តមួយទៅខេត្តមួយនិងមានស្ពានឆ្លងកាត់ទន្លេចំនួនពីរគឺស្ពានសេកុងនិងស្ពានមេគង្គដែលជាការអភិវឌ្ឍន៍របស់ប្រមុខរាជរដ្ឋាភិបាល។ស្ពានផ្លូវទាំងពីរនេះបង្កលក្ខណៈងាយស្រួលសម្រាប់ភ្ញៀវទេសចរណ៍និងវិស័យផ្សេងទៀតហើយក៏ជាសរសៃឈាមសេដ្ឋកិច្ចដ៏សំខាន់ផងដែរ។ក្រៅពីធនធានធម្មជាតិតាមដងទន្លេក៏នៅមានប្រាសាទបុរាណជាច្រើនកន្លែងទៀត។លោកស្រីរដ្ឋរដ្ឋលេខាធិការបានលើកឡើងទៀតថាធនធានដ៏សំបូរបែបគឺជាឱកាសសម្រាប់អ្នកវិនិយោគដ៏ល្អនាពេលអនាគត។
លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានរាយការណ៍ថាខេត្តនេះស្ត្រីជាង ៦០% បានចូលរួមជាមួយវិស័យទេសចរណ៍ដូចជាការចូលរួមបម្រើការងារក្នុងសហគមន៍អេកូទេសចរណ៍បម្រើកានៅតាមភោជនីយដ្ឋានអាហារដ្ឋាននិងសណ្ឋាគារផ្ទះសំណាក់ជាដើម។ក្រៅពីនេះក៏នៅមានកន្លែងកំសាន្តបៀរកាដិនខារ៉ាអូខេក៏សុទ្ធតែបានផ្ដល់ឱកាសដល់ស្ត្រីឲ្យមានការងារធ្វើ៕
ដោយៈសុខុម
