ខណៈដែលអ៊ុយក្រែនបានស្នើសុំប្រព័ន្ធការពារដែនអាកាសទំនើបដើម្បីទុកចាប់មីស៊ីលផ្លោង អ៊ីតាលីបានយល់ព្រម និងសន្យាថានឹងបញ្ជូនប្រព័ន្ធការពារដែនអាកាស SAMP/T ដ៏ខ្លាំងក្លារបស់ខ្លួនដល់អ៊ុយក្រែននៅ៧-៨សប្តាហ៍ខាងមុខ។
នេះដោយយោងតាមរដ្ឋមន្ត្រីការបរទេសអ៊ីតាលី លោក Antonio Tajani បាននិយាយកាលពីថ្ងៃព្រហស្បតិ៍។ លោកថា ប្រព័ន្ធការពារដែនអាកាស Italo-French SAMP/T នឹងដំណើរការនៅក្នុងប្រទេសអ៊ុយក្រែនក្នុងរយៈពេលពីរខែខាងមុខ។ លោក Tajani ក៏បានប្រាប់កម្មវិធីទូរទស្សន៍ក្នុងសុន្ទរកថាដោយផ្ទាល់ថា “ខ្ញុំជឿជាក់វានឹងដំណើរការក្នុងរយៈពេលពីប្រាំពីរទៅប្រាំបីសប្តាហ៍”។ ប្រព័ន្ធនេះអាចតាមដានគោលដៅជាច្រើន និងស្ទាក់ចាប់បាន ១០មីស៊ីលក្នុងពេលជាមួយគ្នា។ វាជាប្រព័ន្ធតែមួយគត់ដែលផលិតនៅអឺរ៉ុប ដែលអាចស្ទាក់ចាប់មីស៊ីលផ្លោងធំៗបាន។
ការស្នើសុំរបស់អ៊ុយក្រែនបានកើតឡើងចំពេលដែលមានរបាយការណ៍មីស៊ីលផ្លោងសាហាវៗរបស់រុស្ស៊ីវាយប្រហារនៅទូទាំងប្រទេសអ៊ុយក្រែនសម្លាប់ជនស៊ីវិលជាច្រើននាក់។ ទីក្រុងKyiv បានស្នើសុំប្រព័ន្ធនេះតាំងពីខែវិច្ឆិកាមកម្ល៉េះ ហើយថ្មីៗនេះក៏បានស្នើឡើងម្តងទៀត ដោយលើកហេតុផលថា មានតែប្រព័ន្ធទំនើបៗរបស់អាម៉េរិក និង SAMP/Tនេះទេដែលអាចទប់ចាប់គ្រាប់មីស៊ីលផ្លោងហោះក្នុងគន្លងផ្លោងរបស់រុស្ស៊ីបាន៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា