ភ្នំពេញ៖អគ្គនាយកដ្ឋានពន្ធដារ នាដើមសប្តាហ៍នេះ បានផលិតវីដេអូបង្ហាញពីរបាយការណ៍សង្ខេប ស្តីពីវឌ្ឍនភាពការងារគ្រប់គ្រងការប្រមូលចំណូលពន្ធ ប្រចាំឆ្នាំ២០២២។
របាយការណ៍នេះបានឱ្យដឹងថា៖នៅឆ្នាំ២០២២ អគ្គនាយកដ្ឋានពន្ធដារប្រមូលចំណូលពន្ធបានចំនួន ១៣ ៩៩៣.២០ប៊ីលានរៀល (ប្រមាណជា ៣ ៤៥៥.១១លានដុល្លារ) ស្មើនឹង១២២.៥៤% នៃផែនការច្បាប់ ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ២០២២ ធៀបនឹងចំណូលពន្ធ-អាករ ក្នុងរយៈពេលដូចគ្នា ឆ្នាំ២០២១ កើនឡើងចំនួន ២ ៧០២.៧៣ ប៊ីលានរៀល (ប្រមាណជា ៦៦៧.៣៤លានដុល្លារ) ស្មើនឹង ២៣.៩៦%។
សម្រាប់រយៈពេល១២ខែ ក្នុងឆ្នាំ២០២២ ចំណូលពីប្រភេទពន្ធសំខាន់ៗ បានរក្សាកំណើនធៀបនឹងរយៈពេលដូចគ្នាក្នុងឆ្នាំ២០២១ ក្នុងនោះ ពន្ធលើប្រាក់ចំណូល ២៣.៧៣%, អាករលើតម្លៃបន្ថែម ៣៤.១០%, ពន្ធលើប្រាក់បៀវត្ស ២២.៤៥%, អាករពិសេស ២៥.៧០%, និង ពន្ធប្រថាប់ត្រាលើការផ្ទេរកម្មសិទ្ធិ និងសិទ្ធិកាន់កាប់អចលនទ្រព្យ ១២.៧០%៕ដោយៈសិរីមតី