ភ្នំពេញ៖នៅក្នុងកម្មវិធីសន្និបាតបូករុបការងារពាណិជ្ជកម្មឆ្នាំ២០២២និងលើកទិសដៅការងារពាណិជ្ជកម្មឆ្នាំ២០២៣របស់ក្រសួងពាណិ ជ្ជកម្មលោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានលើកឡើងអំពីសមិទ្ធិផលដែលអនុវត្តបានក្នុងឆ្នាំ ២០២២ និងទិសដៅឆ្នាំ២០២៣។
ទាក់ទងនឹងទិសដៅសម្រាប់ឆ្នាំ ២០២៣ លោកឧកញ៉ា ចាន់ សុឃាំង បានឱ្យដឹងថា៖សហព័ន្ធស្រូវអង្ករកម្ពុជា បានកំណត់យកគោលដៅចំនួន ២ ធំ គឺ ៖
១. ជំរុញការនាំចេញអង្ករឱ្យបាន ៧៥ម៉ឺនតោននៅក្នុងឆ្នាំ២០២៣ និងឈានដល់ ១ លានតោនអង្ករនៅឆ្នាំ២០២៥។
២. បង្កភាពងាយស្រួលក្នុងការប្រកបរបរអាជីវកម្មក្នុងវិស័យស្រូវអង្ករប្រកបដោយប្រាក់ចំណេញ ភាពធន់ និរន្តភាព និងបរិយាបន្ន។
ជាមួយគ្នានេះដែរ សហព័ន្ធស្រូវអង្ករ ក៏បានដាក់ចេញនូវសកម្មភាពសំខាន់មួយចំនួនដូចជាបន្តពង្រឹងអភិបាលកិច្ចនៃកិច្ចដឹកនាំរបស់សហព័ន្ធស្រូវអង្ករកម្ពុជាឱ្យកាន់តែប្រសើរឡើង និងទទួលបានទុកចិត្តពីសមាជិក និងភាគីពាក់ព័ន្ធ និងរៀបចំផែនការយុទ្ធសាស្ត្ររយៈពេល ៥ឆ្នាំ (២០២៣-២០២៧) ។បន្តសហការជាមួយក្រសួងពាណិជ្ជកម្ម តាមរយៈក្រុមហ៊ុន ហ្គ្រីនត្រេដ ក្នុងការបើកច្រកទីផ្សារថ្មី ជាពិសេសប្រទេសហ្វីលីពីន និងពង្រីកសក្តានុពលទីផ្សារផ្សេងទៀតតាមរយៈការចូលរួមតាំងពិព័រណ៍ពាណិជ្ជកម្មនៅមជ្ឈឹមបូព៌ា សហគមន៍អឺរ៉ុប។ លើសពីនេះសហព័ន្ធស្រូវអង្ករកម្ពុជាក៏បន្តនឹងការពង្រីកសក្តានុពលនឹងស្នើបង្កើនបរិមាណនាំចេញទៅកាន់ទីផ្សារប្រទេសចិនឱ្យបានច្រើនជាង៤០ម៉ឺនតោន នៅក្នុងឆ្នាំ២០២៣ នេះតទៅ និងចូលរួមក្នុងការដោះស្រាយបញ្ហាការគ្រប់គ្រងសន្និធិស្បៀងក្នុងស្រុកជាមួយក្រសួងបន្ថែមទៀត។
ជាងនេះទៅទៀត សហព័ន្ធស្រូវអង្ករកម្ពុជា នឹងបន្តចូលរួមសហការណ៍ជាមួយ ក្រសួងកសិកម្ម រុក្ខាប្រមាញ់ និងនេសាទ លើផែនការផលិតកម្មនិងការផ្គត់ផ្គង់ពូជ រួមជាមួយកិច្ចសន្យាកសិកម្ម ជម្រុញនិងធ្វើកិច្ចសហប្រតិបត្តិការលើការរៀបចំកញ្ចប់តម្លៃផ្នែកភស្តុភារកម្ម និងដឹកជញ្ជូនជូនដល់សមាជិកដើម្បីឱ្យថ្លៃដើមកាន់តែទាប និងមានភាពប្រកួតប្រជែងជាងមុន។ល។ព្រមទាំងរៀបចំឱ្យមានមូលនិធិសម្រាប់ការធ្វើការស្រាវជ្រាវ និងអភិវឌ្ឍន៍ពូជស្រូវដែលឆ្លើយតបទៅនឹងភាពប្រកួតប្រជែងទីផ្សារ ភាពធន់ និងការប្រែប្រួលអាកាសធាតុ។ល។ដោយៈសិរីមតី