អភិបាលក្រុងរុស្ស៊ីបានរាយការណ៍នៅថ្ងៃព្រហស្បតិ៍នេះថា មនុស្ស៧នាក់បានស្លាប់ក្នុងអគ្គិភ័យឆេះការដ្ឋានសំណង់ជាយ Sevastopol តំបន់គ្រីមៀរ។
លោក Mikhail Razvozhayev ដែលជាអភិបាលតំបន់កើតហេតុ Sevastopol តំបន់គ្រីមៀរតែងតាំងដោយរុស្ស៊ី បាននិយាយនៅថ្ងៃព្រហស្បតិ៍នេះថា អគ្គិភ័យបានឆាបឆេះនៅក្នុងអគារស្នាក់នៅពីរជាន់របស់កម្មករសំណង់ស្ថិតនៅផ្លូវហាយវេ Tavrida ដែលជាផ្លូវថ្មីមួយតភ្ជាប់ទីក្រុងSevastopol និង Simferopol ។ ប្រាប់លម្អិតតាមបណ្តាញសារតេលេក្រាម លោក Razvozhayev ថា បន្ទាប់ពីអគ្គិភ័យបានឆាបឆេះពេញមួយយប់ ដោយសារទុស្សេចរន្តអគ្គិសនី ភ្លើងបានរលត់ទៅវិញហើយនៅព្រឹកថ្ងៃព្រហស្បតិ៍ តែជាលទ្ធផលមនុស្ស៧នាក់បានបាត់បង់ជីវិតទៅហើយ។
យ៉ាងណា គណៈកម្មាធិការស៊ើបអង្កេតរបស់រុស្ស៊ី ដែលស៊ើបអង្កេតឧក្រិដ្ឋកម្មធំៗ បាននិយាយថា ខ្លួនបានបើកការស៊ើបអង្កេតលើមូលហេតុនៃការឆេះ ហើយថាអ្នកស៊ើបអង្កេតកំពុងធ្វើការនៅទីតាំងនោះ។ ជុំវិញឧប្បត្តិហេតុនេះ មិនមានប្រភពណាមួយចោទប្រកាន់អ៊ុយក្រែនទេ។ តំបន់គ្រីមៀរគឺជាទឹកដីអ៊ុយក្រែន តែត្រូវបានរុស្ស៊ីដាក់បញ្ចូលជាកម្មសិទ្ធិនៅក្នុងឆ្នាំ ២០១៤។ អ៊ុយក្រែនបាននិយាយថា ខ្លួនមានផែនការចង់រំដោះយកមកវិញទាំងអស់ដោយកម្លាំង៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា