ខណៈពេលដែលអាវុធជំនួយលោកខាងលិចកំពុងស្ថិតនៅតាមផ្លូវមិនទាន់មកដល់ ទ័ពរុស្ស៊ីបានអះអាងជាផ្លូវការថាបានវាយដណ្តើមកាន់កាប់បានភូមិមួយរបស់អ៊ុយក្រែន នៅជាយទីក្រុង Bakhmut ខេត្តដូណេត។
ក្រសួងការពារជាតិរុស្ស៊ីបាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារ ទី ៣១ សប្តាហ៍នេះថា ភូមិ Blahodatne ដែលមានចម្ងាយប្រហែលប្រាំគីឡូម៉ែត្រ ភាគខាងជើងនៃទីក្រុងBakhmut ភូមិសាស្រ្តខេត្តដូណេត ត្រូវបានចាប់យកទៀតហើយ ដោយមានជំនួយគាំទ្រពីកម្លាំងទ័ពលើអាកាសរុស្ស៊ី។ ការប្រកាសនេះបានធ្វើឡើងបីថ្ងៃ បន្ទាប់ពីប្រធានក្រុមទាហានស៊ីឈ្នួល Wagner របស់រុស្ស៊ីបាននិយាយថា កម្លាំងបានចាប់យក Blahodatne ក្នុងការវាយប្រហារមួយដែលអ៊ុយក្រែនបាននិយាយថាបានវាយបកវិញ។ ការចាប់យក Bakhmut ដែលមានប្រជាជនមុនសង្គ្រាមប្រហែល ៧៥.០០០ នាក់នឹងក្លាយជាសមិទ្ធផលសមរភូមិដ៏សំខាន់ដំបូងគេរបស់រុស្ស៊ីចាប់តាំងពីបានដណ្តើមយកទីក្រុង Severodonetsk និង Lysychansk កាលពីខែកក្កដា។
យ៉ាងណាមិញ ចំពោះដំណឹងនេះ សារព័ត៌មានឯករាជ្យមិនទាន់អាចផ្ទៀងផ្ទាត់ត្រឹមត្រូវច្បាស់លាស់នោះទេ។ ខាងអ៊ុយក្រែនបានបដិសេធយ៉ាងដាច់អហង្ការ ដោយនិយាយថា ទ័ពអ៊ុយក្រែនកំពុងវាយទប់ទល់រារាំងទ័ពរុស៊្សីពីការទទួលបានការគ្រប់គ្រងខ្សែផ្គត់ផ្គង់ដ៏សំខាន់នៅ Bakhmut។ មានន័យថា អ៊ុយក្រែននៅតែកំពុងទប់មិនទាន់បាត់បង់ទីតាំងឈរជើងណាទេ។ ក៏ប៉ុន្តែ អភិបាលតំបន់អ៊ុយក្រែនលោក Pavlo Kyrylenko បាននិយាយថា ជនស៊ីវិលពីរនាក់ រួមទាំងក្មេងប្រុសម្នាក់ ត្រូវបានសម្លាប់នៅក្នុងការវាយប្រហារដោយកាំភ្លើងធំរបស់រុស្ស៊ីមកលើ Bakhmut កាលពីថ្ងៃអង្គារផងដែរ។
រដ្ឋបាលហ្សេឡិនស្គីនៅដើមសប្តាហ៍នេះ បានអំពាវនាវឲ្យមានការបញ្ជូនអាវុធឲ្យបានលឿនពីសម្ព័ន្ធមិត្តភាគខាងលិច ដោយគូសបញ្ជាក់ពីការវាយប្រហារឥតសំចៃដៃរុស្ស៊ីនៅទូទាំងតំបន់សមរភូមិ។ ទីប្រឹក្សារបស់លោកហ្សេឡិនស្គីផ្ទាល់គឺ Mykhailo Podolyak បានបង្ហោះសារថា “បើគ្មានអាវុធទេ សង្រ្គាមនឹងរីករាលដាលដល់សហភាពអឺរ៉ុបហើយ”៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
