ចំពេលស្ថានភាពកំពុងប្រថុយញ៉ុចកាន់តែខ្លាំង បារាំងប្រកាសបញ្ជូនប្រព័ន្ធកាំភ្លើងធំ Caesar ១២គ្រឿងបន្ថែមទៀតទៅអ៊ុយក្រែន និងបញ្ជូនបុគ្គលិកបង្ហាត់បង្រៀនរាប់រយនាក់។
រដ្ឋមន្ត្រីការពារជាតិបារាំង លោក Sebastien Lecornu បាននិយាយនៅក្នុងសន្និសីទសារព័ត៌មាននៅទីក្រុងប៉ារីសរួមគ្នាជាមួយសមភាគីអ៊ុយក្រែនកាលពីថ្ងៃអង្គារថា បារាំងនឹងបញ្ជូនប្រព័ន្ធកាំភ្លើងធំ Caesar ចំនួន១២គ្រឿងបន្ថែមទៀត ខណៈ១៨គ្រឿងមុនដែលត្រូវបានចែកចាយរួចហើយ គឺត្រូវបានយកចេញពីផ្នែកនៃហិរញ្ញប្បទានមូលនិធិ ២០០ លានអឺរ៉ូ (២១៧ លានដុល្លារ) បង្កើតដោយបារាំងសម្រាប់ទីក្រុង Kyiv ។ លោកបានបន្ថែមថា បារាំងក៏នឹងបញ្ជូនបុគ្គលិកកងទ័ពចំនួន ១៥០ នាក់ទៅប្រទេសប៉ូឡូញដែរ ដើម្បីទៅបណ្តុះបណ្តាលទាហានអ៊ុយក្រែនខ្ទង់ប្រហែល ៦០០ នាក់ក្នុងមួយខែ។
ចំពោះសំណើយន្តហោះចម្បាំងវិញ រដ្ឋមន្រ្តីការពារជាតិរូបនេះបាននិយាយថា “មិនមានការហាមឃាត់ទេ”។ លោក Lecornu បានរំលឹកឡើងវិញនូវជំហររបស់បារាំងទាក់ទងនឹងការផ្គត់ផ្គង់អាវុធដល់អ៊ុយក្រែន ដោយនិយាយថា វាមិនគួរធ្វើឱ្យសមត្ថភាពការពាររបស់បារាំងថយចុះខ្សោយឡើយ ដែលវាគួរតែជួយអ៊ុយក្រែន ព្រោះអាវុធដែលអ៊ុយក្រែនត្រូវការគឺប្រើសម្រាប់តែការការពារខ្លួនប៉ុណ្ណោះ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
