ភ្នំពេញ៖តុលាការកំពូល នៅព្រឹកថ្ងៃទី១ ខែកុម្ភៈ បានបើកសវនាការជំនុំជម្រះបណ្ដឹងសាទុក្ខជាលើកទី២លើជនជាប់ចោទម្នាក់ករណីឃាតកម្មគិតទុកជាមុនលើសង្សាររបស់ខ្លួន។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានបញ្ជាក់ថា ជនជាប់ចោទឈ្មោះសែម សាន ភេទប្រុស អាយុ២៨ឆ្នាំ ជាប់ចោទពីបទឃាតកម្មគិតទុកជាមុនលើសង្សារ។ជនជាប់ចោទរូបនេះកាលពីថ្ងៃឆ្នាំ២០១៨ ត្រូវតុលាការ ភ្នំពេញបានប្រកាសសាលក្រមផ្តន្ទាទោសដាក់ពន្ធនាគារអស់មួយជីវិតនិងបង្គាប់ឱ្យសងសំណង៤០លានរៀលទៅដើមបណ្តឹង។
ក្រោយមកឈ្មោះ សែម សាន មិនសុខចិត្តក៏បានប្តឹងឧទ្ធរណ៍។ចៅក្រមសាលាឧទ្ធរណ៍ក៏បានជំនុំជម្រះលើបណ្តឹងជនជាប់ចោទនិងប្រកាសសាលដីកាតម្កល់សាលក្រមតុលាការភ្នំពេញទុកជាបានការដដែល។ជនជាប់ចោទឈ្មោះសែម សាន បានប្តឹងសាទុក្ខទៅតុលាការកំពូលហើយតុលាការកំពូលក៏បានចាត់របៀបបង្វិលសំណុំរឿងឱ្យទៅសាលាឧទ្ធរណ៍ជំនុំជម្រះសាជាថ្មី។
សាលាឧទ្ធរណ៍ភ្នំពេញក៏បានសម្រេចប្រកាសសាលដីកាផ្តន្ទាទោសដាក់ពន្ធនាគារកំណត់ចំនួន៣០ឆ្នាំ។ដោយការសម្រេចនេះហើយ ទើបជនជាប់ចោទឈ្មោះ សែម សានសម្រេចប្តឹងសាទុក្ខលើកទី២ទៅតុលាការកំពូលហើយតុលាការកំពូលបានបើកសវនាការនៅថ្ងៃទី១ ខែកុម្ភៈនេះ និងប្រកាសសាលដីកានៅព្រឹកថ្ងៃទី១៣ ខែកុម្ភៈឆ្នាំ២០២៣ខាងមុខ។
គួររំលឹកថា ករណីឃាតកម្មគិតទុកជាមុនប្រព្រឹត្តនៅផ្ទះជួលភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យកាលពីថ្ងៃទី៧ ខែមីនាឆ្នាំ២០១៨ ។ក្នុងសវនាការជនជាប់ចោទប្តឹងសាទុក្ខទៅតុលាការកំពូលនេះសុំឱ្យចៅក្រមបន្ធូរបន្ថយទោសពី៣០ឆ្នាំមក១៥ឆ្នាំវិញ ដោយសារខ្លួនមានជំងឺប្រចាំកាយនិងម្តាយឪពុកចាស់ត្រូវការអ្នកមើលថែ៕