រដ្ឋាភិបាលហូឡង់និយាយថា ខ្លួនរង់ចាំទទួលពិចារណាលើសំណើអ៊ុយក្រែនសុំយន្តហោះចម្បាំងជានិច្ច ក៏ប៉ុន្តែបច្ចុប្បន្ននៅមិនទាន់ឃើញអ៊ុយក្រែនស្នើមកនោះទេ។
![](https://cambodiaflashnews.com/wp-content/uploads/2021/06/top-banner.gif)
សារនេះត្រូវបានថ្លែងដោយនាយករដ្ឋមន្ត្រីហូឡង់ លោក Mark Rutte នៅក្នុងសន្និសីទ សារព័ត៌មានរួមគ្នាជាមួយប្រធានាធិបតីបារាំង Emmanuel Macron នៅទីក្រុងឡាអេ។ លោក Rutte បានមានប្រសាសន៍ថា គ្មានការហាមឃាត់ណាមួយនឹងធ្វើឡើងទេ បើគ្រាន់តែដើម្បីជួយអ៊ុយក្រែនឲ្យឈ្នះសង្រ្គាមជាមួយរុស្ស៊ីនោះ។ លោកថាការផ្គត់ផ្គង់យន្តហោះចម្បាំងនឹងជាជំហានបន្ទាប់ដ៏ធំមួយសម្រាប់ហូឡង់ប្រសិនបើវាមកដល់។ ទោះបីជាហូឡង់នឹងមិនទាន់ហ៊ាននិយាយថាយល់ព្រម តែក៏មិនមានន័យថាបដិសេធដែរ។
យ៉ាងណាមិញ ការសម្រេចចិត្តជាចម្បងមិនមែនស្ថិតលើឯកតោភាគីឡើយ។ នាយករដ្ឋមន្ត្រីប៉ូឡូញ លោក Mateusz Morawiecki បានគូសបញ្ជាក់ថា ការផ្ទេរយន្តហោះចម្បាំង F-16 ឬយន្តហោះណាផ្សេងទៀតទៅអ៊ុយក្រែន គឺអាចធ្វើទៅបានលុះត្រាតែមានការសម្របសម្រួលយ៉ាងជិតស្និទ្ធជាមួយសម្ព័ន្ធមិត្តណាតូផ្សេងទៀត ដូចជាករណីរថក្រោះខ្លារខិន។ ហើយនៅដើមសប្តាហ៍នេះ សហរដ្ឋអាម៉េរិកក៏បានបញ្ជាក់រួចហើយដែរថាមិនមានការបញ្ជូនយន្តហោះណាមួយទៅអ៊ុយក្រែនទេ៕
ប្រភព៖ Ukrainska Pravda
ប្រភពរូប៖Ukrainska Pravda
ប្រែសម្រួល៖សុខ តុលា