ខេត្តព្រះសីហនុ៖ អគ្គិភ័យបានឆាបឆេះក្លិបកម្សាន្តមួយក្នុងក្រុងព្រះសីហនុ បណ្តាលឱ្យមនុស្ស២នាក់បានស្លាប់និងរងរបួស៣នាក់ ស្ថិតនៅម្តុំឧតុនិយមក្នុងក្រុងព្រះសីហនុ។ហេតុការណ៍នេះបានកើតឡើងនៅក្លិបកម្សាន្តមួយយីហោ Julie & Anna Tokyo ក្នុងភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ កាលពីយប់ថ្ងៃទី៣០ ខែមករា។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានឱ្យបណ្តាញសារព័ត៌មានដឹងថា អគ្គិភ័យនេះបណ្តាលមកពីជាងផ្សារដែកក្នុងក្លិប ពេលកំពុងផ្សារក៏ឆាបឆេះតែម្តង។ភ្លាមៗត្រូវបានកម្លាំងសមត្ថកិច្ចនិងមន្ត្រីអាជ្ញាធរចុះទៅអន្តរាគមន៍បាញ់ទឹកពន្លត់មិនឱ្យឆេះរាលដាល។
សមត្ថកិច្ចបានបញ្ជូនជនរងគ្រោះ៥នាក់ទៅមន្ទីរពេទ្យ ប៉ុន្តែដោយបញ្ហារបួសធ្ងន់ធ្ងរ ជនរងគ្រោះក៏បានស្លាប់២នាក់។អ្នករងរបួសចំនួន៣នាក់ ស្លាប់២នាក់នោះឈ្មោះ ហ៊ន ស្រីវ៉េត ភេទស្រី អាយុ១៨ឆ្នាំ បានស្លាប់។ឈ្មោះភន មករា ភេទប្រុស អាយុ ២២ឆ្នាំ បានស្លាប់។ពួកគេរងគ្រោះដោយសារឈ្លក់ផ្សែងភ្លើង។
អ្នករងបួសឈ្មោះណន រតនៈ អាយុ២០ឆ្នាំ- ឈ្មោះប្រាក់សារ៉ូ ភេទស្រី អាយុ ៣៤ឆ្នាំ ជាបុគ្គលិកនិងឈ្មោះ វង្ស សារុំ ភេទស្រី អាយុ២៣ឆ្នាំ ជាបុគ្គលិកក្លិប។ជនរងគ្រោះស្នាក់នៅភូមិ៥ សង្កាត់លេខ៤ ក្រុង/ខេត្តព្រះសីហនុ។ចំណែកម្ចាស់ក្លិបឈ្មោះហុង សេង អាយុ ៣៣ឆ្នាំ។គ្រោះអគ្គិភ័យនោះបង្កការខូចខាតក្លិបនិងសម្ភារត្រូវភ្លើងឆេះអស់ទាំងស្រុង៕ដោយ៖វិចិត្រ
