ភ្នំពេញ៖សាលាបណ្តុះបណ្តាលយូជីឌី បានរៀបចំសិក្ខាសាលាឥតគិតថ្លៃមួយ ស្តីអំពី «ក្បួនកសាងកេរ្តិ៍ឈ្មោះឱ្យល្បីក្នុងបណ្តាញសង្គម និងកសាងប្រាក់ចំណូលខ្ពស់ក្នុងឆ្នាំ២០២៣ »នារសៀលថ្ងៃអាទិត្យ ទី២៩ ខែមករា ឆ្នាំ២០២៣ នៅ មជ្ឈមណ្ឌលសហប្រតិបត្តិការកម្ពុជា ជប៉ុន(CJCC)។
វាគ្មិនដែលបានចូលរួមចែករម្លែកចំណេះដឹង បទពិសោធន៍ នៅក្នុងសិក្ខាសាលានេះ សុទ្ធតែជាអគ្គនាយកនិងក្រុមប្រឹក្សាភិបាលក្រុមហ៊ុន ដែលបានចូលប្រឡូកដោយផ្ទាល់លើវិស័យជំនួញ។
លោក រស់ សុវណ្ណថា នាយកសាលាបណ្តុះបណ្តាលយូជីឌី និងជាអ្នកសម្របសម្រួលកម្មវិធី បានថ្លែងថា៖សាលាបណ្តុះបណ្តាលយូជីឌី មានវគ្គសិក្សាទាំងអស់ចំនួន០៩ ហើយវគ្គសិក្សាទាំងនោះ គឺមិនគិតថ្លៃនោះទេដើម្បីចែកជូនបងប្អូនសិក្ខាកាមដែលមានបំណងចង់សិក្សា។
នៅក្នុងសិក្ខាសាលាស្តីពី«ក្បួនកសាងកេរ្តិ៍ឈ្មោះឱ្យល្បីក្នុងបណ្តាញសង្គមនិងកសាងប្រាក់ចំណូលខ្ពស់ក្នុងឆ្នាំ២០២៣ »វាគ្មិនកិត្តិយសទាំង០៤ រូប ដែលរួមមានឧកញ៉ា ម៉ន សុខា ប្រធានក្រុមប្រឹក្សាភិបាល ក្រុមហ៊ុន យូនីវើសល គ្រុប, ឧកញ៉ា ម៉ាន់ ច័ន្ទឌី អគ្គនាយក ក្រុមហ៊ុន អាយ ឃ្យូ អាយ ខេមបូឌា, ឧកញ៉ា ឌី ជោត អគ្គនាយក ក្រុមហ៊ុន ធារ៉ា លាង ឯ.ក ,និង ឧកញ៉ា អ៊ុច សម្បត្តិ អគ្គនាយក ក្រុមហ៊ុន គ្រួសារកក់ក្តៅ បានចែករំលែកនូវចំណេះដឹង និងបទពិសោធន៍ដែលធ្លាប់ឆ្លងកាត់ ដូចជារបៀបក្នុងការកសាងប្រេនឌីងផ្ទាល់ខ្លួន, ការកសាងប្រេនឌីងសម្រាប់ស្ថាប័ននិងយីហោផ្ទាល់ខ្លួនជាដើម។
លើសពីនេះទៅទៀត វាគ្មិនក៏បានបង្ហាញអំពីរបៀបក្នុងការស្វែងរកខ្លួនឯងឱ្យឃើញ តាមសក្តានុពលរៀងៗខ្លួន,ការចេះរៀបចំផែនការជីវិតនិងរបៀបក្នុងការកសាងប្រាក់ចំណូលខ្ពស់តាមរយៈការវិនិយោគ ឬតាមរយៈក្លាយជាអ្នកលក់អាជីពជាដើម៕ដោយៈសិរីមតី