ព្រះសីហនុ៖ ក្រុមសង្គ្រោះបានជួយជីវិតជនរងគ្រោះ២នាក់ដែលបានលិចទូកបាត់ខ្លួនក្នុងលម្ហសមុទ្រចន្លោះពីកោះរ៉ុងមកក្រុងព្រះសីហនុកាលពីទៀបភ្លឺថ្ងៃទី៣០ មករា ឆ្នាំ២០២៣។
![](https://cambodiaflashnews.com/wp-content/uploads/2021/06/top-banner.gif)
ក្រុមអ្នកជួយសង្គ្រោះបានឲ្យដឹងថា ក្រោយពីមានករណីលិចទូកនៅព្រឹកព្រលឹមថ្ងៃទី៣០មករា២០២៣ ជនរងគ្រោះទាំង២នាក់បានប្រើពីដុងទឹកជ័របណ្តែតខ្លួនក្នុងសមុទ្ររយៈពេលជិត១៤ម៉ោង។លុះដល់ម៉ោងប្រហែលជាជិត៤ល្ងាចទើបអ្នកនេសាទដូចគ្នាបានប្រទះឃើញហើយជួយសង្គ្រោះពីសមុទ្រនៅជិតចំណុចកោះថាស។
ក្រោយទទួលដំណឹងនេះលោកឧកញ៉ាទៀ វិចិត្រ ក៏បានបញ្ជូនអូប៊រ័ល្បឿនលឿនទៅទទួលយកជនរងគ្រោះនាំមកកាន់ក្រុងព្រះសីហនុ។ លោកឧកញ៉ាក៏បានឧបត្ថម្ភថវិកាក្នុងម្នាក់មួយលានរៀលនិងចេញថ្លៃព្យាបាលទាំងអស់ដល់ជនរងគ្រោះ។
ជនរងគ្រោះក្នុងឧបទ្ទវហេតុលិចទូកនោះមានឈ្មោះ នៅ គឹមយ៉េង ភេទប្រុស អាយុ៤៣ឆ្នាំ មុខរបរអ្នកបើកទូកនេសាទ មានស្រុកកំណើតនៅ ខេត្តព្រៃវែង និងម្នាក់ទៀតឈ្មោះ អេង អឿន ភេទប្រុស អាយុ៤៤ ឆ្នាំ មុខរបរ ជាអ្នកនេសាទ មានស្រុកកំណើតនៅខេត្តកែប បច្ចុប្បន្នស្នាក់នៅទំនប់រលក សង្កាត់លេខ១ ក្រុងព្រះសីហនុ ។
ជនរងគ្រោះបានបញ្ជាក់ថា មូលហេតុ ដែលបណ្តាលឲ្យទូកលិច គឺមកពី មានខ្យល់ធ្លាក់ខ្លាំង ទឹករលកធំៗ និងម៉ូទ័របូមទឹកខូច ទើបបណ្តាលឲ្យទូកលិចបែបនេះ៕