ប្រមុខអង្គការណាតូ លោក Jens Stoltenberg បានប្រកាសអំពាវនាវសុំឲ្យកូរ៉េខាងត្បូងបង្កើនការគាំទ្រផ្នែកយោធារបស់ខ្លួនដល់អ៊ុយក្រែនដូចដែលសម្ព័ន្ធមិត្តផ្សេងទៀតបានធ្វើអ៊ីចឹងដែរ។
![](https://cambodiaflashnews.com/wp-content/uploads/2021/06/top-banner.gif)
នៅក្នុងកិច្ចប្រជុំជាមួយមន្ត្រីជាន់ខ្ពស់កូរ៉េខាងត្បូងនៅរដ្ឋធានីសេអ៊ូលថ្ងៃចន្ទនេះ លោក Stoltenberg ដែលជាអគ្គលេខាធិការអង្គការណាតូបានអះអាងថា ព្រឹត្តិការណ៍នៅអឺរ៉ុប និងអាម៉េរិកខាងជើង មានទំនាក់ទំនងអន្តរកម្មជាមួយតំបន់ផ្សេងទៀត ហើយសម្ព័ន្ធភាពពិតជាចង់ជួយគ្រប់គ្រងការគំរាមកំហែងជាសកលដោយការបង្កើនភាពជាដៃគូនៅអាស៊ីខ្លាំងណាស់។ អង្គការណាតូតែងមានគោលបំណងជំរុញទំនាក់ទំនងជាមួយសម្ព័ន្ធមិត្តប្រជាធិបតេយ្យក្នុងតំបន់ប្រឈមមុខនឹងសង្រ្គាមនៅអ៊ុយក្រែន ព្រមទាំងការកើនឡើងការប្រកួតប្រជែងជាមួយប្រទេសចិន។
សម្ព័ន្ធភាពបានថ្លែងអំណរគុណដល់កូរ៉េខាងត្បូងជាអនេកសម្រាប់ជំនួយឥតសំណងដល់អ៊ុយក្រែន ដែលរួមមានទាំងជំនួយមនុស្សធម៌សំខាន់ៗ។ក៏ប៉ុន្តែទន្ទឹមនឹងនេះ ណាតូចង់ឲ្យកូរ៉េខាងត្បូងបំពេញនូវ “តម្រូវការបន្ទាន់” សម្រាប់ជំនួយផ្នែកយោធាពិសេសនាពេលនេះទៅលើគ្រាប់រំសេវ។ លោកបានចង្អុលទៅប្រទេសដូចជាអាល្លឺម៉ង់ និងន័រវែសដែលមាន “គោលនយោបាយយូរអង្វែងមិននាំចេញអាវុធទៅកាន់ប្រទេសដែលមានជម្លោះ” តែក៏ត្រូវបានកែប្រែបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបញ្ជាឱ្យចូលលុកលុយអ៊ុយក្រែនកាលពីខែកុម្ភៈ ឆ្នាំមុន។ ដូច្នេះណាតូអំពាវនាវឲ្យកូរ៉េខាងត្បូងធ្វើដូចគ្នាអ៊ឺចឹងដែរ ដោយបាននិយាយថា “ប្រសិនបើយើងជឿជាក់លើសេរីភាព លទ្ធិប្រជាធិបតេយ្យ ប្រសិនបើយើងមិនចង់ឲ្យរបបផ្តាច់ការឈ្នះ នោះយើងត្រូវតែជួយជំនួយជាអាវុធ”។
គួរជ្រាបថា កូរ៉េខាងត្បូងគឺជាប្រទេសនាំចេញអាវុធពិភពលោកដ៏សំខាន់កាន់តែខ្លាំងឡើង ហើយថ្មីៗនេះបានចុះហត្ថលេខាលើកិច្ចព្រមព្រៀងលក់រថក្រោះរាប់រយគ្រឿងទៅឱ្យបណ្តាប្រទេសនៅអឺរ៉ុប រួមទាំងប្រទេសប៉ូឡូញដែលជាសមាជិកណាតូផងដែរ។ យ៉ាងណាច្បាប់របស់កូរ៉េខាងត្បូង បានហាមប្រាមការនាំចេញអាវុធទៅកាន់ប្រទេសដែលមានជម្លោះសកម្ម ដែលទីក្រុងសេអ៊ូលបាននិយាយថា វាមានការលំបាកក្នុងការ ផ្តល់អាវុធដោយផ្ទាល់ដល់ទីក្រុងគៀវ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា