ភ្នំពេញ៖ កម្មវិធី Maybank CashVille Kidz ជាកម្មវិធីមួយជួយបណ្ដុះនិងបញ្ជ្រាបចំណេះដឹងផ្នែកហិរញ្ញវត្ថុដល់កុមារកម្ពុជា ដែលបាន ចាប់ផ្ដើមតាំងពីឆ្នាំ២០១៧មក ហើយមកដល់បច្ចុប្បន្ននេះកម្មវិធី CashVille Kidz ក៏នៅតែបន្តដំណើរការ ដោយបានបញ្ជូនបេក្ខជនជ័យ លាភីទៅទទួលពានរង្វាន់ថ្នាក់តំបន់នៅប្រទេសម៉ាឡេស៊ីផងដែរ ។
ថ្លែងនៅមុនពេលចេញដំណើរទៅប្រទេសម៉ាឡេស៊ីនៅឯអាកាសយានដ្ឋានអន្តរជាតិភ្នំពេញ អ្នកស្រីអានហេង លក្ខិណា បេក្ខភាពជ័យ លាភីនៃគ្រួសារឆ្នើមពីកម្មវិធីមួយនេះបានមានប្រសាសន៍ថា៖កាលពីឆ្នាំ២០២១កូនរបស់អ្នកស្រី គឺកុមារា សម ប្រាថ្នា បានចូលរួមក្នុងកម្មវិធី CashVille Kid ម្ដងរួចហើយនិងទទួលបានជ័យលាភីថ្នាក់ផងដែរ។សម្រាប់ឆ្នាំ២០២២កន្លងទៅខាងកម្មវិធីក៏បានទាក់ទងលោកស្រីពីការចូលរួមប្រកួតតែលើកនេះគឺតម្រូវឱ្យមានការចូលរួមពីគ្រួសារបន្ថែម។ ដោយចាប់អារម្មណ៍នឹងកម្មវិធីនេះ អ្នកស្រីក៏បានចូលរួមប្រកួតជាមួយនិងកូនទើបទទួលបានជ័យលាភី មានឱកាសទៅចូលរួមទទួលរង្វាន់នៅប្រទេសម៉ាឡេស៊ីផ្ទាល់តែម្ដង ។
អ្នកស្រីបន្តទៀតថានៅក្នុងការចូលរួមនេះ អ្នករៀបចំកម្មវិធីបានដាក់ជាវីឌីអូជាច្រើនមកឱ្យមើលនិងឱ្យអនុវត្តន៍ទៅតាមវីឌីអូនោះ ។ ដោយអ្នកស្រីបានពិភាក្សានិងអនុវត្តន៍ជាមួយកូននិងបានផ្ញើវីឌីអូដែលបានអនុវត្តន៍ទៅអ្នករៀបចំកម្មវិធីវិញទើបខាងកម្មវិធីបានឆ្លើយតបថាអ្នកស្រីបានជាប់និងបានឱ្យអនុវត្តន៍ជាបន្តបន្ទាប់ទៀត ។
អ្នកស្រីបន្ថែមថា កម្មវិធីនេះគឺល្អសម្រាប់ការគ្រប់គ្រងហិរញ្ញវត្ថុ ការចាត់ចែងហិរញ្ញវត្ថុសម្រាប់ក្រុមគ្រួសារដែលចូលរួមប្រកួតប្រជែង ក៏ដូចជាការបញ្ជ្រាបចំណេះដឹងនេះដល់កុមារពីតូចៗផងដែរ។កូនអ្នកស្រីដែលបានចូលរួមប្រកួតគឺមានការផ្លាស់ប្តូរឥរិយាបថច្រើនពីការសុំចាយវាយតាមចិត្តមកជាការចាយវាយដោយមានការគិតគូរជាងមុនហើយគេចាយទៅលើអ្វីដែលជាការចាំបាច់របស់គេតែប៉ុណ្ណោះ ។
លោកនង ចាន់ថន បេក្ខភាពគ្រូឆ្នើមមកពីសាលាបឋមសិក្សារស្មីកុមារនៅក្រុងសួងខេត្តត្បូងឃ្មុំ បានមានប្រសាសន៍ថា តាមរយៈកម្មវិធី CashVille Kidz នេះដែរលោកបានយល់ដឹងច្រើនបន្ថែមពីចំណេះដឹងហិរញ្ញវត្ថុពីព្រោះពីកម្មវិធីតែង តែផ្ញើជាវីឌីអូឱ្យបេក្ខភាពមើលនិងអនុវត្តន៍តាមហើយលោកជាមនុស្សចូលចិត្តមើលអ្វីដែលថ្មីៗដែលផ្ដល់ចំណេះដឹង ដូច្នេះហើយទើបលោកអាចដឹងបន្ថែមនិងអនុវត្តន៍ទៅតាមអ្វីដែលកម្មវិធីបានដាក់ជូន ។
លោក អាន អ៊ន នាយកសាលាបឋមសិក្សារស្មីកុមារ និងជាបេក្ខភាពនាយកសាលាឆ្នើមនៃពានរង្វាន់ CashVille Kidz ក៏បានឱ្យដឹងផងដែរថា ក្នុងចំណោមសាលាដែលចូលរួមប្រកួតទាំងអស់ ទាំងសិស្សនិងគ្រូ មកពីសាលារស្មីកុមារ គឺមានចំនួនច្រើនក្នុងការចូលរួមប្រកួតម្ដងៗទើបលោកបានជាប់ជានាយកឆ្នើមក្នុងចំណោមសាលាបានចូលរួមក្នុងកម្មវិធីមួយនេះ ។
លោកស្រីហេង ធីតា អ្នកគ្រប់គ្រងទូទៅនៃក្រុមហ៊ុន Learning Vision បានមានប្រសាសន៍ឱ្យដឹងផងដែរថាកម្មវិធី ចំណេះដឹងហិរញ្ញវត្ថុគឺជួយបណ្ដុះចំណេះដឹងដល់កុមារតាំងពីពួកគេនៅតូចដើម្បីឱ្យគាត់ក្លាយជាបុគ្គលដែលមាន ចំណេះដឹងផ្នែកហិរញ្ញវត្ថុ មានសមត្ថភាពអាចឱ្យពួកគេជៀសផុសពីគំនាបសម្ភារៈនិយមនៅពេលដែលពួកគេធំឡើង ។ លើសពីនេះពេលដែលគេធំឡើងពួកគាត់អាចយកចំណេះដឹងនោះទៅគ្រប់គ្រងអាជីវកម្មដូចជាដោះស្រាយបញ្ហាហិរញ្ញវត្ថុរបស់ក្រុមគ្រួសារគាត់ ។
លោកស្រីបន្តថានៅប្រទេសជឿនលឿនលើពិភពលោកតែងតែបញ្ជ្រាបចំណេះដឹងហិរញ្ញវត្ថុទៅដល់សិស្សានុសិស្សតាំងពីតូចៗម្ល៉េះដោយនៅក្នុងប្រទេសកម្ពុជាកម្មវិធីអប់រំចំណេះដឹងហិរញ្ញវត្ថុនៅមិនទាន់មានការដាក់បញ្ចូលក្នុងកម្មវិធីសិក្សាតាមរបស់រដ្ឋទូលំទូលាយនៅឡើយ។ យ៉ាងណាក្ដី កម្មវិធីអប់រំចំណេះដឹងហិរញ្ញវត្ថុMoneyTreeបានព្យាយាមដាក់បញ្ចូល ទៅក្នុងការអប់រំ នៅតាមសសាលាមួយចំនួនរួចហើយ ហើយក៏ព្យាយាមដាក់បន្ថែមទៀតតាមតែអាចធ្វើទៅបាន៕ដោយៈផាវី
