ភ្នំពេញ៖អគ្គិភ័យបានឆាបឆេះតូបលក់ខោអាវចំនួន២កន្លែងក្នុងបរិវេណផ្សារសឡា បណ្តាលឱ្យខូចខាតសម្ភារអស់ជាច្រើនទាំងកណ្តាលយប់ ថ្ងៃទី២៩ ខែមករា។
ករណីបង្កការភ្ញាក់ផ្អើលត្រូវបានកម្លាំងសមត្ថកិច្ចមូលដ្ឋានជាមួយនគរបាលជំនាញចុះជួយអន្តរាគមន៍បាញ់ទឹកពន្លត់ភ្លាមៗមិនឱ្យឆេះរាលដាលឡើយ។ ក្រុមពន្លត់អគ្គិភ័យបានឱ្យដឹងនៅព្រឹកថ្ងៃទី៣០ ខែមករានេះថា អគ្គិភ័យបានកើតឡើងសិ្ថតនៅផ្សារសឡា ផ្លូវសឡា សង្កាត់ស្ទឹងមានជ័យទី១ ខណ្ឌមានជ័យ។
សមត្ថកិច្ចបានបញ្ជាក់ថា គ្រោះអគ្គិភ័យឆាបឆេះនេះគឺបណ្តាលមកពីការឆ្លងចរន្តអគ្គិសនី។ក្នុងនោះបានធ្វើឱ្យឆាបឆេះតូបអស់ចំនួន២និងសម្ភារក្នុងតូបនោះអស់ជាច្រើន តែមិនបណ្តាលឱ្យឆេះរាលដាលដល់ផ្ទះអ្នកជិតខាងនិងគ្រោះថ្នាក់មនុស្សទេ។ភ្លើងបានរលត់ទាំងស្រុងនៅយប់ថ្ងៃដដែលដោយសមត្ថកិច្ចប្រើរថយន្តបាញ់ទឹកអស់ចំនួន២គ្រឿង៕ដោយ៖វិចិត្រ
