ភ្នំពេញ៖ប្រទេសកម្ពុជាបានចាប់ផ្តើមនាំចេញអង្ករជាលើកដំបូងនៅឆ្នាំ២០០៩ ដែលមានបរិមាណប្រមាណជា ៦០០តោន ហើយបានបន្តកើនឡើងជាបន្តបន្ទាប់រហូតដល់ជាង ៦៣ម៉ឺនតោនជាមធ្យម នៅក្នុងរយៈពេល ៥ឆ្នាំចុងក្រោយនេះ។នេះបើតាមការលើកឡើងរបស់ លោក ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា ក្នុងពិធីបុណ្យអង្ករលើកទី៥ នាពេលថ្មីៗនេះនៅខេត្តសៀមរាប។
![](https://cambodiaflashnews.com/wp-content/uploads/2021/06/top-banner.gif)
ប្រធានសហព័ន្ធស្រូវអង្ករកម្ពុជា បានឱ្យដឹងថា វិស័យស្រូវអង្ករនៅកម្ពុជាបានដើរតួនាទីយ៉ាងសំខាន់សម្រាប់ទ្រទ្រង់ដល់វិស័យសេដ្ឋកិច្ច ជាតិ ដែលបានធ្វើការនាំចេញអង្ករក្នុងឆ្នាំកន្លងទៅបានចំនួនជាង៦៣ម៉ឺនតោន ដែលគិតជាទឹកប្រាក់បានចំនួនជាង ៤១៨លានដុល្លារ និង នាំចេញស្រូវបានចំនួនជាង ៣.៤លានតោនស្រូវ ដែលគិតជាទឹកប្រាក់បានចំនួនជាង ៨៨១លានដុល្លារ បើសរុបទាំងការនាំចេញអង្ករ និងស្រូវ បានទឹកប្រាក់សរុបប្រមាណជាង ១,២០០លានដុល្លារក្នុងមួយឆ្នាំ ដែលជាចំណែកមួយយ៉ាងសំខាន់សម្រាប់ជួយទ្រទ្រង់សេដ្ឋកិច្ចជាតិ។
បន្ថែមពីនេះ ប្រធានសហព័ន្ធស្រូវអង្ករកម្ពុជារូបនេះ បានបញ្ជាក់ថា អង្ករកម្ពុជាបានទទួលកេរ្តិ៍ឈ្មោះដ៏ល្អប្រពៃជាពិសេសប្រភេទអង្ករម៉ាកវិញ្ញាតកម្ម«ម្លិះអង្គរ»ជាប្រភេទពូជស្រូវផ្ការំដួលបានជាប់ចំណាត់ថ្នាក់ជាអង្ករល្អបំផុតលើពិភពលោកចំនួន៥ដងគឺនៅឆ្នាំ២០១២ -២០១៣-២០១៤-២០១៨ និងចុងក្រោយនៅឆ្នាំ២០២២ នៅខេត្តភូកេត ប្រទេសថៃ។ សម្រាប់ការប្រកួតចុងក្រោយក្នុងឆ្នាំ២០២២ អង្ករពូជស្រូវផ្ការរំដួលដែលស្ថិតក្រោមម៉ាកវិញ្ញាតកម្ម «ម្លិះអង្គរ» ត្រូវបានជាប់ជាអង្ករល្អបំផុតពិភពលោក ដោយជ្រើសរើសចេញពីវត្ថុសំណាកអង្ករគម្រូចំនួនជាង ៤០សំណាកអង្ករ ដែលផ្តល់ដោយប្រទេសចំនួន ៨ប្រទេស។
ក្នុងរយៈពេល ១២ខែ នៃឆ្នាំ២០២២ ប្រទេសកម្ពុជា តាមរយៈក្រុមហ៊ុននាំចេញអង្ករចំនួន ៦១ បាននាំចេញអង្ករទៅកាន់ទីផ្សារអន្តរជាតិចំនួន ៥៩ ប្រទេសដែលក្នុងនោះ ប្រទេសចិនរួមទាំងតំបន់ស្វយ័តហុងកុង ម៉ាកាវ បានចំនួន ២៨៨ ៨៣០ តោន ឬស្មើនឹង ៤៥% ប្រទេសនៅទ្វីបអឺរ៉ុបចំនួន ២៥ បានបរិមាណសរុបចំនួន ២២១ ៥០៤ តោន ឬស្មើនឹង ៣៥% ប្រទេសសមាជិកអាស៊ានចំនួន ៤ បានបរិមាណសរុបចំនួន ៦៤ ៧៣៣ តោន ឬស្មើនឹង ១០% និងបណ្តាគោលដៅផ្សេងៗ នៅអាហ្វ្រិក អាមេរិក អូស្ត្រាលី រុស្សី អ៊ុយក្រែន ។ល។ ចំនួន ២៧ ប្រទេសនិងដែនកោះបានបរិមាណសរុបចំនួន ៦១ ៩៣៧ តោន ឬស្មើនឹង១០% នៃការនាំចេញសរុបចំនួន ៦៣៧ ០០៤តោន ដែលមានតម្លៃសរុបចំនួន ៤១៤.២៩ លានដុល្លារសហរដ្ឋអាមេរិក៕ដោយៈសិរីមតី