ភ្នំពេញ៖កម្លាំងនគរបាលខណ្ឌពោធិ៍សែនជ័យ តាមចាប់បានជនសង្ស័យម្នាក់ដែលប្រើកំណាត់ដែកបំពង់ទីបវាយសម្លាប់ប្រពន្ធនៅភូមិជម្ពូវ័ន២ សង្កាត់ចោមចៅ៣ កាលពីយប់ថ្ងៃទី២៧ ខែមករា។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា ជនសង្ស័យឈ្មោះ សៀង សេត អាយុ៥៩ឆ្នាំ នៅភូមិជម្ពូវ័ន២ សង្កាត់ចោមចៅ៣ ខណ្ឌពោធិ៍សែនជ័យ។ចំណែកជនរងគ្រោះដែលស្លាប់ឈ្មោះលី សុភា អាយុ៥៤ឆ្នាំ។ អ្នកភូមិបានឱ្យដឹងថា រសៀលថ្ងៃទី២៧ ខែមករា គេឃើញបុរសជាប្តីបានកាន់ដែកបំពង់ទីបមួយកំណាត់រត់ចេញពីក្នុងផ្ទះតែមិនមាននរណាចាប់អារម្មណ៍នោះទេ។រហូតដល់ពេលល្ងាច កូនមកពីលក់ដូរវិញក៏ឡើងទៅលើឡៅតឿស្រាប់តែឃើញម្តាយដេកដួលក្នុងថ្លុកឈាមក៏រាយការណ៍ទៅសមត្ថកិច្ចជួយហៅរថយន្តដឹកទៅសង្គ្រោះ។បន្ទាប់ពីក្រុមគ្រូពេទ្យបានពិនិត្យគឺជនរងគ្រោះបានស្លាប់បាត់ទៅហើយ។
កូនៗបានឱ្យដឹងថា ឪពុករបស់គាត់មានជំងឺប្រចាំកាយ គឺសរសៃប្រសាទជាយូរឆ្នាំមកហើយតែមួយរយៈនេះគាត់បានដាច់ថ្នាំមិនទាន់បានទៅបើកនៅមន្ទីរពេទ្យផង ស្រាប់តែជំងឺរើឡើងវិញក៏វាយសម្លាប់ម្តាយពួកគាត់តែម្តង។ក្រោយពីវាយសម្លាប់ប្រពន្ធ បុរសជាឃាតកបានរត់គេចខ្លួន តែត្រូវសមត្ថកិច្ចតាមចាប់បាននៅយប់ថ្ងៃដដែល ត្រូវនគរបាលខណ្ឌពោធិ៍សែនជ័យបន្តនីតិវិធី៕ដោយ៖វិចិត្រ