ភ្នំពេញ៖គ្រោះថ្នាក់ចរាចរដោយមានរថយន្តធុនធំដឹកថ្មបានបុករួចកិនបន្ថែមលើម៉ូតូសណ្តោងរ៉ឺម៉កបណ្តាលឱ្យបុរសម្នាក់រងរបួសបាក់ដៃម្ខាង ត្រូវបានបញ្ជូនទៅសង្គ្រោះភ្លាមៗ។ហេតុការណ៍នេះបានកើតឡើងនៅម្តុំច្រកចូលវត្តជន្លង់ម្លូ ផ្លូវជាតិលេខ៣ ស្ថិតក្នុងសង្កាត់ភ្លើងឆេះរទះ ខណ្ឌកំបូល កាលពីល្ងាចថ្ងៃទី២៧ ខែមករា។
មន្ត្រីប្រចាំគោលដៅបានឱ្យដឹងថា មុនកើតហេតុគេបានឃើញបុរសម្នាក់ជិះម៉ូតូសណ្តោងរ៉ឺម៉កដឹកអំបោសលក់ធ្វើដំណើរតាមផ្លូវជាតិលេខ៣ ពីជើងទៅត្បូង។មកដល់កន្លែងខាងលើស្រាប់តែមានរថយន្តធុនធំដឹកថ្មផ្លាកលេខព្រះសីហនុ3A 2342 បើកពីត្បូងទៅជើងរួចបត់ឆ្លងផ្លូវក៏ជ្រុលបុករួចកិនបន្ថែមលើម៉ូតូបណ្តាលឱ្យបុរសម្នាក់រងរបួសបាក់ដៃម្ខាងនិងម៉ូតូខូចខ្ទេចខ្ទី។
បន្ទាប់ពីមានគ្រោះថ្នាក់ជនរងគ្រោះត្រូវបានដឹកទៅមន្ទីរពេទ្យភ្លាមៗ។ចំណែករថយន្តបង្កនិងម៉ូតូ សមត្ថកិច្ចបានវាស់វែងហើយយករក្សាទុករង់ចាំម្ចាស់ចូលចូលខ្លួនដោះស្រាយ៕ដោយ៖វិចិត្រ
