ភ្នំពេញ៖កម្លាំងនគរបាលខណ្ឌពោធិ៍សែនជ័យ សហការជាមួយនគរបាលខេត្តកំពង់ស្ពឺ បានចាប់ជនសង្ស័យម្នាក់ករណីលួចរថយន្តនិងរៀបចំសំណុំរឿងត្រៀមបញ្ជូនទៅតុលាការ។
សមត្ថកិច្ចបានឱ្យដឹងថា អំពើចោរកម្មលួចរថយន្តនោះនៅភូមិព្រៃព្រីងជើង១ សង្កាត់ចោមចៅទី៣ ខណ្ឌពោធិ៍សែនជ័យ កាលពីម៉ោងជាង៣ទៀបភ្លឺថ្ងៃទី២៧ ខែមករា ហើយជនសង្ស័យព្យាយាមបើកគេចតែត្រូវកម្លាំងសហការចាប់បាននៅភូមិពុទ្រា ស្រុកឱរ៉ាល់ ខេត្តកំពង់ស្ពឺនារសៀលថ្ងៃដដែល។
ជនសង្ស័យឈ្មោះ ឯម ហុងគ្រី អាយុ៣៦ឆ្នាំ អ្នករត់ម៉ូតូឌុប នៅសង្កាត់ព្រែកកំពិស។ចំណែកម្ចាស់រថយន្តឈ្មោះងិន ដាលីន ភេទស្រី អាយុ៣៧ឆ្នាំ នៅភូមិ សង្កាត់ខាងលើ។រថយន្តដែលចោរលួចម៉ាក morning ផ្លាកលេខភ្នំពេញ2AW 0385 ។
មុនកើតហេតុ ជនរងគ្រោះបានទុករថយន្តនៅមុខផ្ទះ។លុះព្រឹកឡើងបាត់មិនឃើញ ទើបទៅប្តឹងសមត្ថកិច្ចឱ្យជួយអន្តរាគមន៍។ដោយសារតែរថយន្តមានភ្ជាប់ប្រព័ន្ធ GPS ទើបកម្លាំងសមត្ថកិច្ចស្រាវជ្រាវឃើញលោតនៅគោលដៅក្នុងទឹកដីខេត្តកំពង់ស្ពឺ ក៏ទាក់ទងទៅសមត្ថកិច្ចខេត្តដើម្បីឱ្យជួយស្ទាក់ចាប់។
បន្ទាប់ពីឃើញរថយន្តដែលចោរបានលួចកំពុងបើកបរនោះ កម្លាំងក៏ឃាត់ឱ្យឈប់ តែជនសង្ស័យនៅតែបន្តបើកគេចខ្លួនរហូតទៅដល់ភូមិពុទ្រា ឃុំត្រពាំងជោរ ស្រុកឱរ៉ាល់ ទើបប្រជាការពារនាំគ្នាយកគោយន្តបិទផ្លូវ ហើយចាប់បានតែម្តង៕ដោយ៖វិចិត្រ