ភ្នំពេញ៖លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានស្នើអាជ្ញាធរគយរបស់កូរ៉េខាងត្បូង ចុះអនុស្សារណៈយោគយល់គ្នា ជាមួយគយរបស់កម្ពុជា ដើម្បីលើកកម្ពស់ការធ្វើពាណិជ្ជកម្មរវាងកម្ពុជា និងកូរ៉េខាងត្បូងឱ្យកាន់តែល្អប្រសើរ។
![](https://cambodiaflashnews.com/wp-content/uploads/2021/06/top-banner.gif)
សំណើបានធ្វើឡើង ក្នុងពេលលោក ប៉ាន សូរស័ក្តិ ជួបពិភាក្សាការងារជា មួយលោក យូន YOON Taesik អតីតអនុរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានអាជ្ញាធរគយប្រទេសកូរ៉េខាងត្បូង កាលពីថ្ងៃទី២៦ ខែមករា ឆ្នាំ ២០២៣ នៅទីក្រុងសេអ៊ូល ប្រទេសកូរ៉េ។
ក្នុងជំនួបនោះ លោក ប៉ាន សូរស័ក្តិ អាជ្ញាធរគយកម្ពុជា និងអាជ្ញាធរកូរ៉េ ដែលបានជួយសម្រួលកម្មភាពនាំចេញ -នាំចូលរវាងប្រទេសទាំងពីរ។ បន្ថែមពីនេះ លោករដ្ឋមន្ត្រី ក៏បានគូសបញ្ជាក់ អំពីសារៈសំខាន់នៃកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដែលទើបនឹង ចូលជាធរមានកាលពីខែធ្នូ ឆ្នាំ២០២២ កន្លងទៅ ដែលនឹងចូលរួមចំណែក សំខាន់ក្នុងការជំរុញការធ្វើពាណិជ្ជកម្ម វិនិយោគ និងសហប្រតិបត្តិការសេដ្ឋ កិច្ចរវាងប្រទេសទាំងពីរផងដែរ។
ទន្ទឹមនេះ លោករដ្ឋមន្ត្រី ប៉ាន សូរស័ក្តិ បានជំរុញឱ្យអាជ្ញាធរគយកូរ៉េ ពិនិត្យលទ្ធភាពចុះហត្ថលេខាលើអនុស្សារណៈនៃការយោគយល់គ្នាជាមួយអគ្គនាយកដ្ឋានគយ និងរដ្ឋាករកម្ពុជា ក្នុងពេលឆាប់ៗខាងមុខ សំដៅលើកកម្ពស់កិច្ចសហប្រតិបតិ្តការ និងផ្តល់កិច្ចសម្របសម្រួលបន្ថែមទៀត ក្រោយពីការពន្យារពេលមួយរយៈដោយសារវិបត្តិជម្ងឺកូវីដ-១៩។
បន្ថែមពីលើនេះលោករដ្ឋមន្ត្រីពាណិជ្ជកម្ម ក៏បានស្នើអាជ្ញាធរគយកូរ៉េ បន្តជួយគាំទ្រកម្ពុជាតាមរយៈ កម្មវិធីបណ្តុះបណ្តាល និងកសាងសមត្ថភាពសម្រាប់មន្ត្រីកម្ពុជាផងដែរ។
លោក YOON Taesik ប្រធានអាជ្ញាធរគយកូរ៉េ បានថ្លែងអំណរគុណលោករដ្ឋមន្ត្រី ដែលបានចំណាយពេលវេលា ពីកម្មវិធីការងារដ៏មមាញឹកចូលរួមក្នុងកម្មវិធីនេះ និងបានអនុញ្ញាតលោកបានចូលជួបពិភាក្សាការងារ។
ប្រធានអាជ្ញាធរគយកូរ៉េរូបនេះ ក៏បានស្វាគមន៍ និងគាំទ្រនូវការបង្កើនកិច្ចសហប្រតិបត្តិការដ៏ជិតស្និទ្ធរវាងអាជ្ញាធរគយនៃប្រទេសទាំងពីរ។ លោកបានបញ្ជាក់ថា នឹងពិនិត្យលទ្ធភាពក្នុងការចុះហត្ថលេខាលើអនុស្សារណៈនៃការយោគយល់គ្នា ស្តីពីកិច្ចការគយរវាងប្រទេសទាំងពីរ ក្នុងពេលឆាប់ៗខាងមុខនេះ ដើម្បីចូលរួមចំណែកជំរុញសកម្មភាពពាណិជ្ជកម្មនិងវិនិយោគរវាងប្រទេសទាំងពីរ។
លើសពីនេះទៀត លោកប្រធានអាជ្ញាធរគយកូរ៉េ ក៏បានគាំទ្រលើសំណើរបស់លោករដ្ឋមន្ត្រី ហើយនឹងបន្តការចែករំលែកចំណេះដឹង បទពិសោធន៍ និងការកសាងសមត្ថភាពជូនមន្ត្រីពាក់ព័ន្ធរបស់កម្ពុជាផងដែរ៕ដោយៈសិរីមតី