នាយករដ្ឋមន្រ្តីអ៊ុយក្រែននិយាយថា លែងមានកង្វល់អ្វីដែលត្រូវគិតច្រើន ខណៈថាមពលបម្រុងទុកគឺមានគ្រប់គ្រាន់ល្មមអាចឆ្លងកាត់រដូវរងាឲ្យផុត ទោះបីមានការវាយប្រហារម្តងហើយម្តងទៀតពីរុស្ស៊ីក៏ដោយនោះ។
នាយករដ្ឋមន្ត្រីអ៊ុយក្រែន លោក Denys Shmyhal បាននិយាយប្រាប់កិច្ចប្រជុំរដ្ឋាភិបាលនៅថ្ងៃអង្គារ ទី២៤ ខែមករាថា ប្រទេសនេះមានធ្យូងថ្ម និងឧស្ម័នបម្រុងទុកគ្រប់គ្រាន់សម្រាប់ខែដែលនៅសេសសល់បន្ទាប់ពីរដូវរងា ទោះបីជាមានការវាយប្រហាររបស់រុស្ស៊ីម្តងហើយម្តងទៀតលើប្រព័ន្ធថាមពលក៏ដោយ។ Shmyhal ថា ស្ថានភាពនៅក្នុងវិស័យថាមពលគឺពិបាកដោយសារការវាយប្រហាររបស់រុស្សីដោយយន្តហោះគ្មានមនុស្សបើក និងមីស៊ីលលើហេដ្ឋារចនាសម្ព័ន្ធសំខាន់ៗ ដែលបានបំផ្លាញប្រព័ន្ធថាមពលប្រហែល ៤០ ភាគរយ ប៉ុន្តែស្ថិតក្រោមការគ្រប់គ្រង បន្ទាប់ពីយុទ្ធនាការរយៈពេលមួយខែ តុល្យភាពថាមពលត្រូវបានគ្រប់គ្រង។
“សម្រាប់ពេលនេះ រាល់ការប៉ុនប៉ងរបស់រុស្ស៊ីក្នុងការបំផ្លាញអ៊ុយក្រែនទៅក្នុងភាពងងឹតត្រូវបានបរាជ័យ។ “យើងមានទុនបម្រុងគ្រប់គ្រាន់ដើម្បីបន្ត និងបញ្ចប់រដូវកាលកម្ដៅក្នុងរបៀបធម្មតា។ លោកបានបន្ថែមថា ឧស្ម័នប្រហែល ១១ ពាន់លានម៉ែត្រគុបត្រូវបានរក្សាទុកក្នុងឃ្លាំងផ្ទុកឧស្ម័ន ហើយធ្យូងជិត ១,២ លានតោនក៏ស្ថិតក្នុងការស្តុកទុកយ៉ាងមានសុវត្ថិភាពផងដែរ”។
គួរបញ្ជាក់ឲ្យដឹងថា ចាប់តាំងពីឆ្នាំ២០១៥មក អ៊ុយក្រែនមិនបាននាំចូលឧស្ម័នធម្មជាតិដោយផ្ទាល់ពីប្រទេសរុស្ស៊ី។ អ៊ុយក្រែនបានទិញយកឧស្ម័នធម្មជាតិតែពីបណ្តាប្រទេសនៅអឺរ៉ុប ដូចជាស្លូវ៉ាគីជាដើមប៉ុណ្ណោះ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
