ហ្សេឡិនស្គី បានប្តេជ្ញាបង្រ្កាបអំពើពុករលួយ បន្ទាប់ពីរដ្ឋបាលបានចាប់ខ្លួនអនុរដ្ឋមន្រ្តីម្នាក់ទទួលបន្ទុកហេដ្ឋារចនាសម្ព័ន្ធ សង្ស័យពីបទទទួលលុយប្រហែល៤០ម៉ឺនដុល្លារអាម៉េរិកតាមរយៈការនាំចូលម៉ាស៊ីនភ្លើង។
នេះដោយយោងតាមសាររបស់លោកប្រធានាធិបតីហ្សេឡិនស្គី ក្នុងបណ្តាញតេលេក្រាម កាលពីថ្ងៃចន្ទទី ២៣ ខែមករា ឆ្នាំ២០២៣។ លោកបានសរសេរថា “ថ្ងៃនេះ គណៈរដ្ឋមន្ត្រីប្រទេសអ៊ុយក្រែនបានបណ្តេញអនុរដ្ឋមន្ត្រីម្នាក់ ដែលត្រូវបានលាតត្រដាងដោយ NABU ជាការិយាល័យប្រឆាំងអំពើពុករលួយជាតិអ៊ុយក្រែន”។ ក្នុងសេចក្តីថ្លែងការណ៍ មន្រ្តីនេះមិនត្រូវបានបញ្ជាក់ឈ្មោះជាសាធារណៈនោះទេ គ្រាន់តែដឹងថាគាត់គឺជាអនុរដ្ឋមន្រ្តីអ៊ុយក្រែន ទទួលបន្ទុកចាត់ចែងហេដ្ឋារចនាសម្ព័ន្ធក្នុងគ្រាសង្រ្គាម។ សេចក្តីថ្លែងការណ៍បានចោទប្រកាន់មន្រ្តីរូបនេះ ថាបានកិបកេងលុយប្រហែល៤០ម៉ឺនដុល្លារអាម៉េរិក តាមរយៈការនាំចូលម៉ាស៊ីនភ្លើងពីបរទេសមកកាន់អ៊ុយក្រែន។ ស្ថិតក្រោមការឃាត់ខ្លួន និងដំណើរការច្បាប់ ការកាត់ទោសមិនទាន់ត្រូវបានបង្ហាញនោះទេ។
ជាការក្រើនរំលឹកទៅកាន់មន្រ្តីថ្នាក់ក្រោមដទៃទៀត លោកស្គីបាននិយាយក្តែងៗថា “ខ្ញុំចង់ឲ្យនេះជាសញ្ញារបស់យើងចំពោះអ្នកទាំងអស់ផ្សេងទៀតឲ្យដឹងថា ការធ្វើសកម្មភាព ឬអាកប្បកិរិយាបំពានគោលការណ៍យុត្តិធម៌ នឹងទទួលលទ្ធផលយ៉ាងណា”។ លោកស្គីបន្ថែមថា លោកដឹងឮគ្រប់រឿងទាំងអស់គេចមិនរួចឡើយ ទោះបីឥឡូវនេះ ការផ្តោតសំខាន់បំផុតគឺទៅលើវិស័យការពារជាតិ គោលនយោបាយការបរទេស និងសង្រ្គាមជាត្រីមុខក៏ដោយ៕
ប្រភព៖ Dailymail
ប្រភពរូប៖Dailymail
ប្រែសម្រួល៖សុខ តុលា
