ភ្នំពេញ៖ បុរសម្នាក់ស្ថិតក្នុងការធ្វេសប្រហែស ដោយបានលេបថ្នាំទាំងសម្បកចូលនៅក្នុងបំពង់អាហារ ហើយប្រញាប់ទៅមន្ទីរពេទ្យមិត្តភាពខ្មែរ-សូវៀតដើម្បីយកថ្នាំនោះចេញមកវិញ។
ប្រភពពីក្រុមគ្រូពេទ្យផ្នែកជំងឺប្រព័ន្ធរំលាយអាហារ នៃមន្ទីរពេទ្យមិត្តភាពខ្មែរ-សូវៀត ហៅពេទ្យរុស្ស៊ី បានឱ្យដឹងថា កាលពីថ្ងៃទី១៨ ខែមករា ឆ្នាំ២០២៣ ក្រុមគ្រូពេទ្យឯកទេសប្រព័ន្ធរំលាយអាហារ ចូលរួមសហការជាមួយគ្រូពេទ្យផ្នែកសណ្ដំនៃមន្ទីរពេទ្យរុស្ស៊ី បានអន្តរាគមន៍ជួយសង្គ្រាះបុរសម្នាក់ភ្លាមៗដោយឆ្លុះក្រពះអ្នកជំងឺ។
គ្រូពេទ្យដដែលបានបន្តថា តាមរយៈការឆ្លុះក្រពះបុរសម្នាក់ដោយមិនបានបញ្ជាក់ពីអត្តសញ្ញាណនោះមក ក៏បានរកឃើញថ្នាំទាំងសម្បកក្នុងបំពង់អាហាររបស់អ្នកជំងឺ ទើបក្រុមគ្រូពេទ្យបានចាប់យកថ្នាំទាំងសម្បកនោះចេញបានទាន់ពេលវេលានិងប្រកបដោយសុវត្ថិភាព។
បន្ទាប់ពីបានជួយសង្គ្រោះ ក្រុមគ្រូពេទ្យជំនាញបានផ្ញើសារប្រាប់ចំពោះបងប្អូនប្រជាពលរដ្ឋទាំងអស់ ជាពិសេសយាយ តា ដែលមានវ័យជរា មុនទទួលទានថ្នាំពេទ្យត្រូវពិនិត្យឱ្យបានច្បាស់លាស់ជាមុនសិន ថាតើអស់សម្បកហើយឬនៅ និងមានអ្វីនៅក្នុងថ្នាំដែលត្រូវលេបនោះ៕ដោយ៖វិចិត្រ