ប្រទេសដាណឺម៉ាក បានប្រកាសចូលរួមបរិច្ចាគកាំភ្លើងធំផលិតដោយបារាំង Caesar ១៩ គ្រឿង ជាជំនួយដល់អ៊ុយក្រែន ដើម្បីប្តេជ្ញាចិត្តជាសម្ព័ន្ធមិត្តប្រឆាំងរុស្ស៊ី។
រដ្ឋមន្ត្រីការពារជាតិរបស់ប្រទេសដាណឺម៉ាក លោក Jakob Ellemann-Jensen បានមានប្រសាសន៍កាលពីថ្ងៃទី១៩ម្សិលមិញនេះថា ប្រទេសដាណឺម៉ាកនឹងបរិច្ចាគប្រព័ន្ធកាំភ្លើងធំ Caesar ដែលផលិតដោយបារាំងចំនួន ១៩ គ្រឿងពិតមែនដល់ប្រទេសអ៊ុយក្រែន។ រដ្ឋមន្រ្តីបាននិយាយនៅក្នុងសេចក្តីថ្លែងការណ៍មួយថា “យើងបានទាក់ទងជាបន្តបន្ទាប់ជាមួយប្រជាជនអ៊ុយក្រែនអំពីកាំភ្លើងធំ Caesar ហើយខ្ញុំសប្បាយចិត្ត ដែលឥឡូវនេះយើងបានទទួលការគាំទ្រយ៉ាងទូលំទូលាយពីសភាដាណឺម៉ាកទាំងមូល ក្នុងការបរិច្ចាគវាដល់ការតស៊ូសេរីភាពរបស់អ៊ុយក្រែន”។ យានកាំភ្លើងយន្តផ្លោង Caesar គឺជាសព្វាវុធអេឡិចត្រូនិចផលិតដោយបារាំងនៅទសវត្សរ៍១៩៩០។ វាគឺជាអាវុធបំពាក់គ្រាប់ផ្លោងស្តង់ដាររបស់ណាតូ មានចាប់ទីតាំងនិងបាញ់ដោយស្វ័យប្រវត្តិក្នុងរយៈចម្ងាយច្បាស់លាស់ជាង ៤០គីឡូម៉ែត្រ។ Caesar មានម៉ាស៊ីនដើរដោយថាមពលប្រេងម៉ាស៊ូត ទទួលស្គាល់ជាគ្រឿងប្រយុទ្ធដ៏ល្អមួយនៅអឺរ៉ុប។
សូមបញ្ជាក់ឲ្យដឹងថា ការផ្តល់ជូន Caesar ដោយភាគីដាណឺម៉ាក គឺកើតឡើងបន្ទាប់ពីប្រទេសស៊ុយអែត Nordic កាលពីដើមថ្ងៃព្រហស្បតិ៍បានប្រកាសកញ្ចប់ជំនួយយោធាថ្មីដល់អ៊ុយក្រែន ដែលមានតម្លៃប្រហែល៤១៩ លានដុល្លារអាម៉េរិក។ កញ្ចប់នោះរួមមានរថពាសដែកប្រយុទ្ធថ្មើរជើង និងប្រព័ន្ធកាំភ្លើងធំ Archer ក៏ដូចជាអាវុធធុនស្រាល អាវុធប្រឆាំងរថក្រោះ NLAW ចល័តឧបករណ៍បោសសម្អាតមីន និងកាំភ្លើងវែង៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា