ភ្នំពេញ៖បុរសម្នាក់កំពុងឌុបស្រីស្នេហ៍បំណងចូលផ្ទះសំណាក់ តែជួបក្រុមចោរ៤នាក់ជិះម៉ូតូ២គ្រឿងបានដកកាំភ្លើងវ៉ៃក្បាលឱ្យរយះហូរឈាមរួចប្លន់យកម៉ូតូនិងទូរសព្ទជិះគេចខ្លួនបាត់។ករណីនេះបានកើតឡើងនៅត្រង់ដីឡូត៍មួយក្នុងសង្កាត់ចោមចៅទី១ ខណ្ឌពោធិ៍សែនជ័យកាលពីម៉ោង៥ភ្លឺ ថ្ងៃទី២០ ខែមករា។
នគរបាលប៉ុស្តិ៍បានឱ្យដឹងថា បុរសរងគ្រោះឈ្មោះផុត សុផាត អាយុ២៧ឆ្នាំ ជាជាងបាញ់ថ្នាំឡាន ស្នាក់នៅជិតវត្តស្លែង ផ្លូវជាតិលេខ៣ កន្លែងកំណើតស្រុកទ្រាំង ខេត្តតាកែវ។ចំណែកស្ត្រីគូស្នេហ៍អាយុ២៩ឆ្នាំ ធ្វើការនៅហាងខារាអូខេ ស្នាក់នៅទួលពង្រ ជិតកន្លែងកើតហេតុស្រុកកំណើតខេត្តស្វាយរៀង។ម៉ូតូដែលក្រុមជនសង្ស័យប្លន់យកទៅនោះម៉ាកហុងដាឌ្រីមផ្លាកលេខតាកែវ 7842។
ជនរងគ្រោះបានប្រាប់សមត្ថកិច្ចថា ដំបូងពួកគាត់២នាក់បានចេញពីក្លិបវីតណាយ ជិះម៉ូតូតាមផ្លូវទួលពង្របំណងចូលដេកផ្ទះសំណាក់។មកដល់កន្លែងខាងលើស្រាប់តែមានជនសង្ស័យមួយក្រុមមានគ្នា៤នាក់ជិះម៉ូតូ២គ្រឿងមកពីក្រោយកៀរម៉ូតូខ្លួនឱ្យដួល ហើយក៏ដកកាំភ្លើងខ្លីវ៉ៃក្បាលបណ្ដាលឱ្យរយះហូរឈាមរួចយកទូរសព្ទនិងម៉ូតូជិះទៅបាត់។
ក្រោយមកនគរបាលប៉ុស្តិ៍ចោមចៅទី១ បានចុះដល់កន្លែងកើតហេតុឱ្យជនរងគ្រោះទៅដាក់ពាក្យបណ្ដឹងដើម្បីសមត្ថកិច្ចស្រាវជ្រាវចាប់ក្រុមចោរទាំងនោះយកមកផ្ដន្ទាទោសតាមច្បាប់៕ដោយ៖វិចិត្រ
